Ertzaintzak 26 urteko gizon bat atxilotu du Bizkaiko hiriburuan, hiriaren erdialdeko enpresa batean indarra erabiliz lapurreta egitea leporatuta. Atxiloketa Bilboko Ertzain-etxeak egindako ikerketari esker egin ahal izan da.
Atxiloketa atzo, asteazkena, eguerdian, egin zuten Bilbon, bertako Ertzain-etxeko uniformerik gabeko baliabideek, ikerketa-lanetan ari zirenek, enpresa batean egindako lapurretaren ondorioz egindako ikerketa batengatik atxilotzeko agindua zuela bazekiten gizon bat aurkitu zutenean.
Lapurreta 2023ko abenduaren 18an egin zuten Bizkaiko hiriburuko erdialdean dagoen enpresa baten instalazioetan. Enpresa unibertsitate-ikasgelak eta -zerbitzuak eskaintzeaz gainera, enpresentzako bulegoak ere eskaintzen dituen eraikin batean zegoen. Antzeko egintzenagatik aurretik ere atxilotu izan duten lapurrak modus operandi oso zehatza erabiltzen zuen. Jendearentzat irekitako lekuak aukeratzen zituen, hala nola hotelak, enpresak edo saltokiak. Horietara sartu eta diskrezio osoz aztertzen zituen, eta gero, lokalak itxita zeudenean, itzuli egiten zen, interesatzen zitzaizkion objektuak non aurkitu jakinda. Modu horretan jardun zuen abenduaren 18an. Indarra erabiliz sartu ondoren, eraikinaren zati batzuk miatu zituen, eta, azkenean, hainbat objektu teknologiko hartu zituen enpresaren instalazioetatik.
Ikerketa honen esparruan, ikerketaz arduratu diren agenteek aipatutako egitateak leporatu zizkioten atxilotuari. Polizia-eginbideak amaitu ondoren, atxilotua agintari judizialaren eskuetan jarri zuten.