Athleticek EH Kopako finalerako txartela lortu du

Lehoiak CA Osasuna baino gehiago izan ziren eta igandean Tolosan jokatuko den Realaren aurkako finalean egongo dira

Athleticek EH Kopako finalerdian garaipena lortu du CA Osasunari 3-1 irabazita.
Partida erabakita geratu zen lehen zatian, eta zuri-gorriak 3-1eko abantailarekin joan ziren atsedenaldira. David Aznarren taldea aurrez aurre izango da igandean, 16:00etan, Realaren aurka Tolosan jokatuko den finalean. Bere hamargarren garaipena bilatuko du udako euskal txapelketan.

Lehen gola Maddik egin zuen 22. minutuan Itxasok ateratako korner bat buruz sarera bidaliz. Bautista berdinketa lortzen saiatu zen gutxigatik gora joan zen beste erremate batekin. 29. minutuan, Merche Izalek markagailua orekatu zuen, baloia arearen bihotzetik errematatuz. Lehoiak, ordea, erritmo biziagoan eta baloi jabetza gehiagorekin, markagailuan aldentzea lortu zuten Sanadriren golari esker, Zugastik emandako asistentziaren ondoren. Oguizak denboraldiaurreko lehen minutuak zituen, eta gorritxoen arean baloia lapurtu eta Patricia Zugastik gol bihurtutako penaltia jaso zuen.

Bigarren zatian, zuri-gorriak nagusi izaten jarraitu zuten. Maitanek Mariana Cerroren laugarren gola saihestu zuen. Partida kontrolpean zuela, Athleticek harrobiko jokalariak sartu zituen zelaian eta sendo jarraitu zuen amaierara arte. Quiñonesek ez zuen lan gehiegirik izan eta lehoiek Realaren aurkako igandeko final handirako txartela lortu zuten. Lehia polita izango dute Tolosan, Liga F-ko denboraldi hasieraren atarikoa izango dena.