D’Anjou Sailburuak Euskadiko pentsioak etorkizunean garatuko dituzten sistema osagarriak sustatzearen alde egin du

Noël d’Anjou Ogasun eta Finantzetako sailburuak amaiera eman dio gaur XI. Global Pensions Programme programari. Programa bi egunez garatu da BECen, eta itxiera-ekitaldian aipamen berezia egin dio Eusko Jaurlaritzak “Euskadiko pentsioak etorkizunean garatzeko sistema osagarriak” sustatzen jarraitzearen alde egindako apustuari. Apustu “irmoa da”, adierazi du Euskadin lehen aldiz egiten ari den pentsioei buruzko nazioarteko foro horretan. Bertan izan dira Robert Merton Nobel sariduna, Latinoamerikako zenbait ministro eta beste berrehun pertsona inguru.

Konpromiso horren erakusgarri, d’Anjou sailburuak joan den otsailean bultzatutako esparru arautzailea nabarmendu du, hain zuzen Eusko Jaurlaritzak epe luzerako aurrezki-aurreikuspena sustatzeko, instituzionalizatzeko eta ahalik eta eraginkortasun handiena lortzeko helburuarekin “esparru koherente bat” definitzeko dekretua onartu izana. “Gizarte-aurreikuspen osagarria orokortu nahi da, eta helburu horri negoziazio kolektiboan adostutako enplegu-sistemen hedapenaren bidez hel dakioke”, eman du aditzera.

Esparru arautzailearen bultzada horrez gain, d’Anjou sailburuak Ogasun eta Finantza Saila Euskadiko Gizarte Aurreikuspen Osagarriaren irismena handitzeko garatzen ari den jarduketen berri ere eman du ekitaldi horretan. Zehazki, zenbait mugarri nabarmendu ditu:

• Langile autonomoentzako gizarte-aurreikuspeneko sistema osagarri bat ezartzeko hitzarmena sinatzea Euskadiko hiru merkataritza-ganberekin.
• Bizkaiko eta Arabako lurraldeetarako beste Borondatezko Gizarte Aurreikuspeneko Erakunde sektorial bat sortzen laguntzea, “Etorkizuna BGAE” izenekoa.
• Euskal Autonomia Erkidegoko Gizarte Aurreikuspen Osagarriaren Behatokia sendotzea. Behatoki hori kontrol- eta jarraipen-tresna tekniko iraunkorra da, eta pentsioen inguruan nazioartean egiten den ikerketa garrantzitsua biltzen du.
• Borondatezko Gizarte Aurreikuspeneko Erakundeei buruzko aplikazio informatiko berria, herritarrei gai horri buruzko informazioa eman dakien. Haien eskubide ekonomikoak, jaso dezaketen pentsioa eta etorkizuneko pentsio-eskubideen simulatzaile bat, besteak beste.
• Prestakuntza bultzatzen jarraitzea, gure estrategiaren giltzarri gisa.

Pentsioei buruzko munduko ekitaldi handienaren bigarren eta azken jardunaldi honetan, Eusko Jaurlaritzak Borondatezko Gizarte Aurreikuspeneko Erakundeen jatorria, garapena eta ezarpena azaldu ditu. “Aitortu eta balioesten den gizarte-aurreikuspen osagarriko eredua” da, nabarmendu du d’Anjouk, eta gogorarazi du “aitzindariak izan ginela 1983an pentsio-sistema osagarriak ezartzen”.

Euskal Autonomia Erkidegoko eredu horrek interesa piztu du foro honetan dauden beste ordezkaritza batzuen artean, eta aldebiko topaketak egin dira esperientziak eta intereseko esparru komunak partekatzeko.

Amaitzeko, Ogasun eta Finantzetako sailburuak adierazi duenez, “sinetsita nago Gizarte Aurreikuspen Osagarriaren garapena eta egokitzapena lagungarria izango dela datozen hamarkadetan gizarte-babeseko sistema sendoagoa lortzeko”, eta keinu bat egin du ezagutza-truke horri jarraipena eman dakion Global Pensions Programme programaren hurrengo edizioan —datorren urtean Atlantikoa zeharkatu eta Latinoamerikan egingo da—.