Bizkaiko kirolak bat egin du gizarte-zailtasunak dituzten 1.500 haurrentzako 3.500 jostailu lortzeko

Bizkaiko kirolak bat egin du gizarte-zailtasunak dituzten 1.500 haurrentzako 3.500 jostailu biltzeko. Josu Perón, Bizkaiko Gurutze Gorriko presidentea; Itxaso Erroteta, Bilboko Udaleko Gazteria eta Kirol zinegotzia; Isabel Iturbe, SURNE Bilbao Basketeko presidentea; Galder Reguera, Athletic Club fundazioko proiektu arduraduna; eta Metro Bilbaoren zuzendaria, Eneko Arruenabarrena, izan dira gaur goizean Esperantza pilotalekuan, “Haien eskubideak jokoan” kanpaina solidarioa aurkezteko. Kanpaina horren bidez, Gazteen Gurutze Gorriak jostailu berriak biltzen ditu Gabonetan Bizkaian.

Bizkaiko Gurutze Gorriak, Gazteen Gurutze Gorriaren bidez, erronka dauka 3.500 jostailu berri, ez-beliko eta ez-sexista biltzeko, gizarte-zailtasunak dituzten familietako 1.500 haurrentzat. “Haien eskubideak jokoan” lelopean, Gabonetan egiten den kanpaina berezi hori urteko proiektu baten esparruan kokatzen da: “Jostailu Hezitzailea”. Proiektu horren helburua da 0 eta 18 urte bitarteko haurren jolaserako eskubidea bermatzea eta jolasen erabilera sustatzea, hezkuntza-tresna gisa, eskolan eta familian balioak transmititzeko eta garapen ebolutiboari laguntzeko.

Datorren abenduaren 13an eta 14an, Bizkaiko hamabost saltokik baino gehiagok parte hartuko dute jostailuak jasotzeko gune gisa, bezeroek dohaintzak in situ egin ahal izan ditzaten. Jostailuak jasotzeko gune horietan Bizkaiko Gurutze Gorriko 250 boluntario inguru egongo dira, saltoki edo enpresa laguntzaileen bezeroen dohaintzak jasotzeko, eta jostailuak adinaren arabera hautatu eta antolatzeko.

Bilketa-guneetan jostailuak entregatzeaz gain, dohaintzak egin ahal izango zaizkio kanpainari, 38061 telefono-zenbakira SMSak bidaliz JUGUETE hitzarekin (3 €) eta 38061 zenbakira BIZUMak eginez (gutxienez 5 €). Horrela, bilketa-gune fisikoetara joan nahi ez duten pertsonek ere lagundu ahal izango dute. Bildutako diru guztia jostailuak erosteko erabiliko da.

“JOLASAREN EGUNA” BILBON, ABENDUAREN 27AN, ESPERANTZA PILOTALEKUAN

Haurren artean jolas hezitzailea sustatzeko asmoz, Gazteen Gurutze Gorriak haurrentzako doako jarduera bat antolatu du Bilbon, abenduaren 27an, 17:00etatik 20:00etara, Esperantza pilotalekuan.

Haur guztiei zuzendutako ekintza hori Bilboko Udalaren babesari esker egin daiteke, zeinak Esperantza pilotalekua laga baitu egun berezi horren eszenatokia izan dadin. Egun horretarako programazioan jarduera ugari izango dira: material birziklatuekin jostailuak sortzeko tailerrak, legoak, mozorroak, aurpegiak margotzekoa, photocallak, jolas tradizionalak eta zozketak, baita sorpresak ere.

Jolas guztiak haurrek helduekin jolastu ahal izateko pentsatuta daude; izan ere, nahitaezkoa da adingabeei egunean zehar laguntzea, eta gurasoek haiekin espazioa eta ikaskuntza partekatzea sustatzen da.

“PELUXEEN TIRADA HANDIA”, ABENDUAK 22, BILBAO ARENAN

Bestalde, Surne Bilbao Basket-ek, bere fundazioaren bidez, zale guztiak animatzen ditu “Peluxeen tirada handian” parte hartzera, datorren abenduaren 22an, 17:00etan, Manresaren aurkako partiduan, inongo haurrik ez dadin geratu oparirik gabe Gabonetan. Gainera, aurten Metro Bilbaoren babesa izango dute, eta Moyua eta Zazpikaleetako geltokietako kaleko sarrerak beltzezko gizonen taldeko maskotaren peluxe handi batekin apainduko ditu, herritarrak ekintza solidario horretan parte hartzera animatzeko.

Athletic Clubek, bere fundazioaren bidez, aurten ere egin du bat kanpainarekin, eta jostailuak jasotzeko hiru gune jarriko ditu: Ibaigane jauregia, Lezama eta San Mameseko Bazkideen Arretarako Bulegoa.

Kanpainaren programazio osoa, bilketa-guneak, ordutegiak eta informazioa @CruzRojaBizkaia erakundearen sare sozialetan kontsulta daitezke.

Ekimen hori posible da jostailuak biltzeko gune gisa funtzionatzen duten erakunde askoren lankidetzari eta parte-hartzeari esker, beren bulegoetan jostailuak jasotzen baitituzte langileen artean edo jostailuak ematen baitituzte.

Hauek dira erakunde laguntzaileak: Bilboko Udala, Athletic fundazioa, Bilbao Basket, Iberdrola, Banco Santander, El Corte Inglés, Eroski, Alcampo, Mutualia, EDP, BAT Accelerator Tower, PWC fundazioa, Juguettos, Decathlon, Carrefour, Enekuri Motor, Erriberako Merkatua, Gastro Basque, ITC Packaging, Axa, Nortegas, Legión 501, BEC, ABB, GI Group, Suanayes, Maier, Inmobiliaria Century 21, Sener, Zabalgarbi, Barton Films, Satel.