XVII. Blas de Otero-Ángela Figuera Poesia Sariak eta XXV. Miguel de Unamuno Saiakera Sariak banatu dira

XVII. Blas de Otero-Ángela Figuera Poesia Sariak eta XXV. Miguel de Unamuno Saiakera Sariak banatu dira gaur eguerdian Bilboko Udaletxeko Arabiar Aretoan. Juan Mari Aburto Bilboko alkatea izan da ekitaldiko buru, Gonzalo Olabarria Kultura eta Gobernantzako zinegotziarekin, sarituekin eta bi deialdietako epaimahaikideekin batera.

Poesia eta saiakera literatura-sari hauek urtero deitzen ditu Bilboko Udalak, eta sariei izena ematen dieten idazle bilbotarren eta idazlearen oroimena eta lana bizirik mantentzea dute helburu. Literatur jarduera eta talentu berrien agerpena sustatzeaz gain, 2023-2033 Bilboko Kultura Plan Estrategikoaren barruan kokatzen da helburu hori.

BLAS DE OTERO – ÁNGELA FIGUERA POESIA LEHIAKETA

Blas de Otero-Ángela Figuera 2024 Poesia Sariak lehiaketara aurkeztu diren Euskadiko, Estatuko, Europako eta Latinoamerikako lanen parte-hartze handia izan du berriro. Zehazki, 1.000 lan baino gehiago aurkeztu dira aurten, aurreko urtean baino 200 bat gehiago.

Partehartzaile kopuruaz gain, lanen kalitate maila eta gai eta estilo aniztasuna azpimarratu behar da. Aurkeztu diren lan argitaragabeen artean, korronte klasikoenen zein azken joera eta abangoardia poetikoen ordezkariak egon dira.

Literatura munduan finkaturik dagoen lehiaketa hau, bere zorroztasun eta inpartzialtasunagatik literatura arloan ondoen baloratuenetako bat da. Horrela, Blas de Otero – Ángela Figuera Poesia Sarien XVII. edizioko saridun nagusia David López Sandoval izan da, «Arte Menor» lanagatik, gaztelaniazko modalitatean. Egile kordobarra Hispaniar Filologian doktorea da Murtziako Unibertsitatean, eta Gaztelania eta Literatura irakasten ditu. Eleberria, antzerkia eta batez ere poesia idatzi ditu.

Epaimahaiak «Arte Menor» «jakinduria poetikoz betetako lana» dela adierazi du, «tradizioa naturaltasunez txertatzen dakiena eta kantu bihurtzen diren eta gai unibertsal handiak jorratzen dituzten poemetan trebetasun erritmiko aparta erakusten duena».

Euskarazko modalitatean, Iban Garro Alzuri izan da saritua, “Euri Beroak” lanagatik. Epaimahaiak azpimarratu duenez, poema liburu hau oso ondo egituratuta dago, tonu eta erritmo egokietan. Nabarmentzeko da ere bere originaltasuna prosa poetikoa eta lirika uztartzen dituenean eta egileak ironiaren eta itxaropenik ezaren arteko jolasa mantentzen duen hizkuntza poetikoa erabiltzen duenean.

Kimikan lizentziatua Donostiako Euskal Herriko Unibertsitatean, Iban Garro hainbat poesia-lanen egilea da. «Larrosa bat Groenlandian» lanarekin Iruñea Hiria saria irabazi zuen 2023an.

Sari hauek 5.500 eurokoak dira modalitate bakoitzeko eta ondoren argitaratuko dira.

MIGUEL DE UNAMUNO SAIAKERA LEHIAKETA

Miguel de Unamuno Saiakera Lehiaketaren XXV. edizio honetan, gaztelaniazko 149 lan aurkeztu dira guztira. Horietatik guztietatik, epaimahaiak bere maila altua nabarmendu du.

Jorge Fernández Gonzaloren “Paradigmas migrantes. Estéticas y experiencias migratorias de mujeres” saiakera izan da irabazlea gaztelaniazko modalitatean. Sormena eta lanaren ikuspegia erabakigarriak izan dira epaimahaiak saiakera hori saritzeko orduan. Epaimahaiak, gainera, bost ataletan egituratutako lan baten interesa eta gaurkotasuna baloratu ditu, non migrazio-prozesua testuinguru politiko, espazial eta denborazko desberdinetan bizitzeko modu desberdinak aurkezten diren, emakume migratzaileen posizio marjinala eta konplexua agerian utziz.

Jorge Fernández Gonzalo Filologia Hispanikoan (UCM) eta Filosofian (UAM) doktorea da, eta gaur egun Filosofiako irakaslea da Madrilgo Complutense Unibertsitatean. Saiakera-egile gisa, filosofia, soziologia eta teoria literarioko dozena bat liburu baino gehiago argitaratu ditu, eta, gainera, hamar bat poema-libururen egilea da.

7 saiakera aurkeztu diren euskarazko modalitatean Mitxelko Uranga Álvarezek jaso du saria, «Emognosioa Egia-ostea, Konspiranoia eta negazionismoa» lanagatik. Epaimahaiak egindako balorazioaren arabera, gaurkotasun handiko gai bati heltzen zaio eta, gainera, gaiari buruzko hausnarketa sakona egiten da hainbat helegiteren bidez.

Filosofian doktorea, Mitxelko Urangak diziplina hau irakasten du Bigarren Hezkuntzan eta masterreko irakaslea da Udako Euskal Unibertsitatean. Hainbat saiakera argitaratu ditu, baita lan poetikoa ere.

Kasu honetan, bi egileek 6.000 euroko saria jasoko dute eta euren saiakerak argitaratu egingo dira.

GABRIEL ARESTI IPUIN LEHIAKETA

Joan den urrian banatu ziren Gabriel Aresti Ipuin Lehiaketako sariei gehitu behar zaizkie sari hauek. Literatur sorkuntza sustatzea dute helburu eta aldi berean, garai hartako euskal idazle bikainenetako baten bizitza eta lana ezagutarazten laguntzen du, euskarazko poesiaren berritzaile nagusia baita.