Osasun Sailak Euskadiko 2025eko txertoen egutegia eguneratu du, bai helduena bai haurrena, euskal herritarren immunitatea indartzeko

Bizitza osoan zehar txertaketen egutegia etengabe berrikusten da, azken ebidentzia zientifikoen eta erakunde teknikoen aholkuen arabera eguneratzeko. Hala, Euskadiko Txertoen Aholku Batzordearen gomendioak kontuan hartuta, Osasun Sailak zenbait aldaketa egingo ditu 2025erako euskal txertaketa-egutegian, bai helduen kasuan, bai haurren kasuan.

Izan ere, Alberto Martínezek zuzentzen duen Saileko Osasun Publikoko Zuzendaritzak egutegi horietan egindako aldaketen eta kasu bakoitzean aplikatu beharreko irizpideen berri eman die Osakidetzako, elkargo profesional sanitarioetako eta Euskadiko osasun-zentro pribatuen sareko profesionalei.

• HELDUEN KASUAN, pneumokokoaren aurkako txertoa jartzea gomendatzen da.

Pertsonaren baldintzak kontuan hartuta, paziente hauek lehentasun osoa izango dute: txertaketa-protokoloa hasten duten GIBdun pazienteek; esplenektomiaren ondorengo lehen urtean dauden pazienteek; kimioterapia hasi baino 14 egun lehenago gutxienez bertaratzen diren edo tratamendua hasi duten paziente onkologikoek; tratamendu biologikoan dauden pazienteek; giltzurrunetako eta gibeleko aurretransplantean dauden pazienteek; 4/5 estadioetan edo dialisian giltzurruneko gutxiegitasun kronikoa duten pazienteek; eta Ama Hematopoietiko autologoen transplantea duten paziente alogenikoek/CAR-T. Talde horretan, immunitate-sistema arriskuan jar dezaketen egoera klinikoei emango zaie lehentasun berezia.

Lehentasunari dagokionez, hurrengo kolektiboa diabetesa, giltzurrunetako edo gibeleko gaixotasun kronikoa, patologia kardiobaskularra eta BGBK duten pertsonek osatzen dute. Kasu honetan, ez da immunizazio aktiborik planteatzen, baizik eta txertaketa oportunista bat, aurretik pneumokokoaren aurkako txertorik jaso ez duten pertsonentzat soilik.

Azkenik, 65 urte edo gehiagoko helduen artean, gaur egungo pneumokokoaren aurkako txertoaren ordez beste txerto aurreratuago bat jarriko da. Txerto horrek 20 serotipo baino gehiago barne hartzen ditu. Ordezkapena pixkanaka egingo da, 75 urte edo gehiagoko pertsonekin hasita.

• HAURREN TXERTAKETA-EGUTEGIAN bi berrikuntza daude:

Alde batetik, errotabirusaren aurkako txertoa sartzen da haur osasuntsuentzat, hiru dositan —2, 4 eta 6 hilabetera— banatuta, eta 2025eko urtarriletik aurrera jaiotakoei emango zaie.

Bestalde, haur osasuntsuen artean, 13 serotipoko pneumokokoaren aurkako txerto bateratuaren ordez, 15 serotipo hartzen dituena jarriko da. Txerto hori 2, 4 eta 11 hilabeteren buruan emango da, bai 2025etik aurrera jaiotakoen kasuan, bai 2024an jaio eta aurreko txertoarekin hasitako immunizazio-pauta osatzeke dutenen kasuan. Arrisku-talderen bateko kide diren haurren kasuan, 13 serotipoko eta 23 polisakaridoko pneumokokoaren aurkako txertoen jarraibide sekuentzialaren ordez, 20 serotipoko pneumokokoaren aurkako txertoa jarriko da; eta hori jartzeko jarraibidea, hori hartzen hastean haurrak zuen adinak finkatuko du.