Euskal Herriko Unibertsitateak «CRYSTAL: Laguntza emozionalerako eta bezeroari laguntzeko elkarrizketa sistemak» izeneko HORIZON Europe proiektua koordinatzen du. Proiektu hau MSCA-SE bat da, hau da, elkartutako erakundeen arteko egonaldien eta trukeen bidez garatuko da, ikerketarako sektore arteko eta diziplina arteko lankidetzen bidez, baita prestakuntzako eta ikerketa-sareak sortzeko jardueren bidez ere. Horrela, proiektuko bazkide bakoitzeko langileen esperientziak eta ezagutzak areagotuko dira.
Partzuergoa Europako bost unibertsitatek osatzen dute, eta UPV/EHU da proiektuaren koordinatzailea. Bertan, Granadako Unibertsitateak, Erresuma Batuko University of Ulsterrek, Italiako Luigi Van Vitelli Unibertsitateak eta Austriako Management Center Innsbruckek parte hartzen dute. Bestalde, proiektuko bazkideei bost enpresa gehitu zaizkie: Intelligence Voice dy Pnuema Health Erresuma Batukoa, Apptek Alemaniarra, Smarted Italiarra eta CASER residencial espainiarra.
CRYSTAL proiektuak pertsonentzat eta enpresentzat benetan baliagarriak diren elkarrizketa-sistemak garatzea du helburu. Hau da, sistema autonomoak, pertsona ahulei laguntza emozionala ematen dietenak, eta bezeroari arreta emateko eta kontsultari erantzuteko zerbitzuen bidez laguntza aurreratua ematen dutenak. Proiektu honek arreta jartzen du zerbitzua enpatikoa, erakargarria, zehatza eta eraginkorra izan dadin. Horregatik, elkarrizketa-ereduak eta -sistemak garatuko dira, zeregin zehatzetara egokitzeko ikaskuntza-estrategia berriak proposatuz, hizkuntza-eredu handi batzuk (LLM ingelesezko sigletan) eta lotutako metodologiak aztertuz.
CRYSTALen helburu zientifikoa da pertsonak ardatz dituen diseinuan praktika hobeak garatzea, erabiltzaileen, profesionalen eta enpresen eskakizunak eta beharrak beteko dituzten elkarrizketa-sistemak garatzeko. Gainera, elkarrizketen analisi bat lortu nahi dute, ikerketaren eta enpresaren helburuetarako informazio erabilgarria ateratzeko. Metodologiari dagokionez, IAn oinarritutako teknologia ikertu eta inplementatu nahi dute, elkarrizketa-sistemak garatzeko, berariazko zeregin bakoitzean eredu optimizatuak eta eraginkorrak erabiliz. Azkenik, pertsonek IArekin duten interakzio-teknologiaren onarpena eta adopzioa ebaluatu nahi dute, ebaluazio-protokolo baten bidez, erabiltzaileek IA teknologia hainbat erabilera-kasutan onartzeko eta hartzeko dituzten motibazioak hobeto ulertzeko.
Azaroaren 4an eta 5ean Bilbon egin zen lehen ekitaldi baten ondoren, proiektuaren lanak hasi dira dagoeneko. Bertako koordinatzailea, M. Inés Torres irakaslea, pertsona-makina interakzioan eta Adimen artifizialean aditua, abenduan eta urtarrilean Ipar Irlandako Pneuma Healthcare enpresan egonaldi bat egiten ari da profesional berrien entrenamenduan eta online terapian adituak diren psikologoekin. Bertan, ahotsa eta hizkuntza tratatzeko eta aztertzeko teknologia berriak aztertzen dituzte, enpresaren helburuetan aplikatzeko.