Sestaon atxilotu dituzte ibilgailu batzuetan lapurreta egiteagatik eta, ihes egiten saiatzean, aparkatuta zeuden beste auto batzuen aurka talka egiteagatik

Ertzaintzako agenteek 35 urteko gizon bat eta 45 urteko emakume bat atxilotu dituzte gaur, ostirala, goizaldean, Sestaoko hainbat ibilgailutan indarra erabiliz lapurreta egiteagatik. Biek, patruilek harrapatu egin dituztela ikustean, auto batean ihes egin dute, eta kalean aparkatuta zeuden beste ibilgailu batzuen aurka talka egin ondoren atzeman dituzte.

Goizaldeko lau eta erdiak aldera, Ertzaintzari jakitera eman diote Sestaoko Buenavista kaleko aparkaleku batean aparkatuta zeuden ibilgailuen inguruan hainbat pertsona zebiltzala. Herritarrak babesteko lanetan ari ziren dotazioak berehala agertu dira adierazitako lekura, eta ikusi ahal izan dute bi pertsona materiala ateratzen ari zirela furgoneta txiki batetik. Polizia ikustean, biak korrika hasi dira, eta horietako bat emakume bat gidatzen ari zen ibilgailu batean sartu da, eta emakumeak abiadura handian eta kontrako noranzkoan ekin dio martxari.

Patruiletako batek ihes egin duen eta argiak aktibatu gabe zituen ibilgailuari segi dio, eta Juan Tomás Gandarias kalearen inguruan gidariak kontrola galdu du eta bertan aparkatuta zeuden bi autoren aurka talka egin du, kalteak eraginez.  Une horretan, biak atxilotu egin dituzte, gizona berriz ere korrika ihes egiten saiatu bada ere. Gizonak Durangoko Epaitegi batek bilatzeko eta atxilotzeko emandako agindua ere bazuen indarrean.

Auto barruan obrako hainbat erreminta eta makina zeramatzaten, eta, egiaztatu ahal izan denez, lapurretan harrapatu zituzten furgonetatik hartutakoak ziren. Furgonetak leiho bat hautsita eta atzeko atea behartuta zituen. Buenavistan aparkatuta zeuden antzeko beste bi garraio-ibilgailuk ere kalteak zituzten kristaletan eta barrualdea nahastuta zuten.

Bi atxilotuak Epaitegira eramango dituzte polizia-eginbideak amaitu ondoren. Sestaoko Ertzain-etxeak indarra erabiliz egindako lapurreta-delitu honen ikerketa irekita du, eta dagoeneko identifikatu du ihes egin duen hirugarren inplikatua.