Eusko Jaurlaritzak % 50 handitu du euskal artisten obrak erosteko finantzaketa 2025ean

«Eusko Jaurlaritzak % 50 handituko du jardunean dauden artisten lanak erosteko finantziazioa«, ziurtatu du Ibone Bengoetxea lehen lehendakariorde eta Kultura eta Hizkuntza Politikako sailburuak Artium Museoan, Bilduma Partekatuaren proiektuaren esparruan 2024an egindako artelanen erosketei buruz egindako aurkezpenean. Lehendakariordearen esanetan, igoera hori «kulturaren, gure artisten aitortzaren, gure kultura-ondarea ezagutaraztearen eta hainbat eragileren arteko lankidetzaren aldeko apustu argi eta zintzoaren ondorio da».

Partekatutako Bilduma 2020an sortu zen Eusko Jaurlaritzaren eskutik, Euskal Herriko Arte Garaikidearen Museoarekin, Artium Museoarekin, Arte Ederren Bilboko Museoarekin eta Tabakalera Kultura Garaikidearen Nazioarteko Zentroarekin lankidetzan. Urte hauetan, ekimen honi esker, Euskadik 97 egileren 172 lan ditu. 2024ko azken edizio honetan, 28 obra erosi dira, 17 artistenak.

Ekimen honen helburua, Bengoetxea lehendakariordearen hitzetan, «kultura, artisten kolektiboa, arte garaikidea eta gure egiteko modua etorkizuneko Euskadi berriare eraikuntzaren parte izatea da, etorkizunean izango garenaren parte».

Lehendakariordearekin batera, aurkezpenean parte hartu dute Arabako diputatu nagusi eta Artium Fundazioaren Patronatuko lehendakari Ramiro González, Artium Museoko zuzendari Beatriz Herráez, Arte Ederren Bilboko Museoko zuzendari Miguel Zugaza eta Tabakalerako Kultura Garaikidearen Nazioarteko Zentroko zuzendari nagusi Edurne Ormazabal. Aurkezpenean izan dira, halaber, 2024ko erosketen zerrendako zenbait artista, hala nola, Jesus Mari Lazkano, Gabriela Muñagorri, Juan Mieg, Natalia Suarez Ortiz de Zarate, Juan Aizpitarte, Darío Urzay y Claudia Rebeca Lorenzo.

Bilduma Partekatuaren proiektua

Kultura eta Hizkuntza Politika Sailak dirulaguntza izendun baten bidez bultzatzen du ekimen hau Artium Museoa, Euskal Herriko Arte Garaikidearen Museoari.

Bilduma Partekatu bat sortzeko proiektu hau, lehen aldiz, 2020an jarri zen martxan, Covid-19aren pandemiak eragindako osasun-krisiaren testuinguruan, egoera hark gogor kaltetutako sektore bateko profesionalei laguntzeko helburuarekin.

Artelanen eta artisten aukeraketa ekitaldi bakoitzean antolatzen da, Arte Ederren Bilboko Museoko, Tabakalera Kultura Garaikidearen Nazioarteko Zentroko eta Artium Euskal Herriko Arte Garaikidearen Museoko arduradunek parte hartzen duten erosketa-batzordearen lanean oinarrituta. Bilduma Partekatuak arte garaikideko jardunaren eta hizkuntzen arloan lan egiten duten museoen eta zentroen arteko ekintza koordinatua indartzen laguntzen du. Eskuratutako ondare-funtsak Artium Museoaren bildumaren parte dira, eta artelanen fitxa teknikoetan Eusko Jaurlaritzaren Kultura eta Hizkuntza Politika Sailak bultzatutako eskuratze-programa islatzen da.

Erositako lanak zenbait diziplinatako —pintura, eskultura, bideoa, marrazkia, collagea edo argazkia— jarduneko artistenak dira. Era berean, edizio honetan egindako erosketetan zenbait belaunaldi eta ibilbidetako artistak barne hartu dira. Guztira 16 artistaren eta artista-talde baten 28 lan dira.

Plan honen barruan eskuratutako artelanak Euskal Herriko Arte Garaikideko Museoaren Bilduman txertatuko dira, haren ondare-funts publikoaren parte gisa, eta Bilduma Partekatua epigrafean katalogatuko dira. 2020. urtetik, guztira, 97 artistaren, kolektiboak barne, 172 artelan eskuratu dira.

Lehendakariordeak aurreratu du datorren ediziorako aurrekontua % 50 handitu dela, 300.000 euroraino.

Artistak eta artelanak

2024an Bilduma Partekatuan artista hauen artelanak sartu dira: Juan Aizpitarte (Donostia, 1974); Ana Laura Aláez (Bilbo, 1964); Itziar Barrio (Bilbo, 1965); June Crespo (Iruñea, 1982); Mikel Díez Alaba (Bilbo, 1947) erositako bi pieza José Ramón Morquillasekin (Barakaldo, 1947-Bilbao, 2023) lankidetzan egin ziren; Jon Gorospe (Gasteiz, 1985); Tom Johnson (Colorado, Ameriketako Estatu Batuak, 1939 – Paris, Frantzia, 2024); Kimia Kamvari (Kolonia, Alemania, 1986); Jesús Mari Lazkano (Bergara, 1960); Abigail Lazkoz (Bilbo, 1972); Claudia Rebeca Lorenzo (Logroño, 1988); Juan Mieg (Gasteiz, 1938); Gabriela Muñagorri (Donostia, 1974); Juan Pérez Agirregoikoa (Donostia, 1963); Alex Reynolds (Bilbo, 1978); Natalia Suárez Ortiz de Zárate (Gasteiz, 1994); eta Darío Urzay (Bilbo, 1958).

Hautatu diren artelanetan arte-jardun garaikidea gauzatzeko askotariko formatuak eta teknikak biltzen dira, hala nola pintura, argazkigintza, eskultura, collagea, bideoa, instalazioa eta marrazketa.

Artelan eta artista multzo honen aukeraketan askotariko irizpideak hartu dira aintzat, besteak beste: euskal erakunde publikoen programen barruko artistek sortutako lanak sartzea; segmentu eta ibilbide profesional desberdinei arreta ematea, finkatuenetatik belaunaldi gazteagoetara; duela gutxiko artelanei zein obra historikoei lekua egitea; eta Euskadiko arte-sistema osatzen duten galeriekin eta beste eragile batzuekin lan egitea.