EKP´k 2,5 milioi euro inbertituko ditu Bermeon laketontzien kudeaketa hobetzeko

• Amaia Barredo EKP-Euskadiko Kirol Zentroetako Administrazio Kontseilu berriko buruan
• Portuko gasolindegietako erregai-hornidura erregularrari oniritzia ematea
• Instalazio fotovoltaiko berria Hondarribiko portuan

Amaia Barredo Eusko Jaurlaritzako Elikadura, Landa Garapen, Nekazaritza eta Arrantza sailburua, , EKP-Euskadiko Kirol Portuen Administrazio Kontseilu berriaren buru izan da gaur goizean. Kontseilu horrek, 2024´ko kontuak formulatzeaz gain, baimena eman du Bermeoko portuan 2,5 milioi euroko inbertsioa egiteko, Artza´ko dartsena handitzeko. Dartsena horretan 100 amarraleku berri egongo dira, baita ur eta elektrizitate kontrolpeko dorretxoak eta Kapitaintzaren eraikin berria ere, zeinak 2026´tik aurrera emango baitu zerbitzua, eta lehorreratzeko orga konpontzeko lanak amaituko baitira.

EKP´ren Kontseiluak bere portuetako bideozaintza-sistemak eta EKPk kudeatzen dituen Hondarribia, Orio, Getaria eta Plentziako portu eta kirol-dartsenetako segurtasun- eta zaintza-zerbitzuak berritzea eta mantentzea ere onartu du. Aurten 325.000 euroko kostua izango dute gehienez.

EKPk kudeatutako portuetako gasolindegietan erregai-hornidura erregularra kontratatzeak 4.430.000 euroko gehieneko kostua ekarriko du lau urterako, eta, logikoa denez, horiek berreskuratu ahal izango dira erabiltzaileen kolektiboari geroago ordainduz gero. Era berean, instalazio fotovoltaiko bat eraikiko da Hondarribiko portuan.

“Euskadiko Kirol Portuak entearen misioa da Euskadiko aisialdiko portuak eta instalazio nautikoak planifikatzea, kudeatzea eta sustatzea, amarraleku, instalazio eta zerbitzu osagarri egokiak eskainiz eraginkortasunez, kalitatez, jasangarritasunez eta berdintasunez”, adierazi du Amaia Barredok. “Gainera, portuaren eta hiriaren arteko integrazioa errazten da eta aisialdiko nautikaren garapenean eta, horrekin, gure itsasertzaren garapen sozial eta ekonomikoan laguntzen da.  Portuak kudeatzeko euskal eredu bat sendotzen ari gara, portuak kudeatzen dituzten erakundeen eta horien erabiltzaileen ikuspegitik erreferentea izango dena, Europa Atlantikoko aurreratuenen ildotik”, erantsi du Barredok.

Aisialdiko nautikan motor elektrikoek izango duten etorkizuna ere baloratzen da EKPn.  Amaia Barredoren ustez, elektrifikazio hori “beharrezkoa dena baina oraindik hutsala dena motel doa, baina horretan ari gara lanean eta haren garapena aurreikusten ari gara.  Bordelen proba pilotuak egiten ari dira, eta emaitzak gertutik jarraituko ditugu. Gai horiek kontuan hartu behar dira gure portuen antolamenduan, karga-puntuei, horien funtzionamenduari, zaintzari eta abarri dagokienez.  Oraingoz, egoitza-portua duten ontzientzat ez litzateke beharko karga-puntu berezirik. Ibilgailu elektrikoentzako karga-puntuak instalatzeko lanean ari gara”.

EKPk 2.493 amarraleku kudeatzen ditu euskal kostalde penintsularreko 246 kilometroetan.  Amaia Barredoren ustez, “sortu diren Portuko Udal Kontseilu berriek harremanak eta koordinazioa hobetzen lagunduko dute.  Klubak eta elkarte gehienak lan bikaina egiten ari dira ideiak emanez eta ekitaldiak antolatuz. Itsasertza antolatzeko eta kudeatzeko eskumenaren transferentziak kudeaketa hobetzea ekarriko du, hemendik egingo baita”.

“Egungo Arrantzako eta Itsasertzaren Garapeneko Sailburuordetzak ekonomia urdinarekin zerikusia duten gai eta eragile guztiak biltzen ditu, eta horrek sinergiak eta lankidetza errazten ditu. Teknologia berriek portuetako konexioak hobetzen, egoitzak Eusko Jaurlaritzaren sistemara konektatzen eta aurreordainketako dorretxoak portu guztietara zabaltzen laguntzen dute, bai eta portuetara sartzeko txartel bakarra ezartzen, gure aktiboen kudeaketa hobetzeko aplikazioak inplementatzen eta iragaitzazko ontzientzako auto check-in aukera zabaltzen ere”, nabarmendu du Amaia Barredok.