Ertzaintzak martxoan Donostian gertatutako homizidio bat argitu du

Ertzaintzak gizon bat eta emakume bat atxilotu ditu joan den martxoaren 8an Donostiako Bidebieta auzoan gertatutako homizidioaren egileak izatea leporatuta.

Martxoaren 8ko goizaldean, ordu biak aldera, Ertzaintzak jakin zuen adin ertaineko gizon bat konortea erdi galduta aurkitu zutela kalean, Donostiako Bidebieta auzoan.  Gizona osasun-zentro batera eraman zuten, baina handik ordu batzuetara hil zen.

Ertzaintzak, Gipuzkoako Ikerketa Kriminaleko Lurralde Zerbitzuaren bidez, Auzitegiko Medikuntzako Euskal Institutuak egindako autopsiaren ondorioak jaso ondoren, ikerketa hasi zuen gertaeraren inguruabarrak argitzeko.

Egindako ikerketen ondorioz, homizidio bat eta indarkeria erabiliz egintako lapurreta bat izan zirela argitu zuten eta horien bi egileen identitatea jakin ahal izan zuten.  Horrela, joan den asteartean, ikertzaileek 31 urteko gizon bat eta 33 urteko emakume bat atxilotu zituzten Gipuzkoako hiriburuan, homizidio-delitu bat eta indarkeria erabiliz egindako lapurreta bat leporatuta, biktimaren telefono mugikorra eta beste objektu batzuk hartu baitzituzten. Ikertzaileek bi atxilotuen etxebizitzak miatu zituzten agintari judizialak baimenduta.

Bi atxilotuek polizia-aurrekari ugari dituzte, batez ere ondarearen aurkako delituengatik. Biak agintari judizialaren eskuetan jarri dituzte, eta gizona espetxeratzeko agindua eman du eta emakumea aske uztekoa kautelazko neurriak ezarrita.