Bizkaiko Foru Aldundiak Eskulangintza Sustatzeko 2025eko Programa berria onartu du, 375.500 euro emanez

Foru dekretu berriak Bizkaiko 100 artisau-erakunde ingururi laguntzeko laguntzak arautzen ditu. Eskabideak apirilaren 22tik maiatzaren 16ra bitartean aurkeztu ahal izango dira

Bizkaiko Foru Aldundiak Eskulangintza Sustatzeko 2025eko Programaren oinarriak eta deialdia arautzen dituen foru dekretua onartu du, eta 375.500 euroko aurrekontua eskaini du horretarako. Programa horren helburua lurraldeko artisau-sektorea dinamizatzea eta indartzea da, lehiakortasuna hobetu, berrikuntza babestu eta asoziazionismoa sustatzearren.

Laguntzak norgehiagoka bidez ebatziko dira, eta artisau-erakundeei zein sektoreko elkarteei zuzenduta daude; dirulaguntza horiei esker, Bizkaiko Artisauen Erregistro Ofizialean inskribatutako ehunka artisau-erakunde inguru finantzatu ahal izango dira. Programa bi jarduketa-arloren inguruan egituratzen da:

• Artisau-erakundeek lehiakortasuna indartzeko garatutako jarduerak, hala nola makineria eta ekipamendu informatikoa erostea, tailerrak hobetzea, azoketan edo prestakuntza-ikastaroetan parte hartzea eta sustapen-materiala prestatzea.
• Tokiko elkarte eta erakundeek bultzatutako jarduerak, zeinen artean baitaude artisau-enpresei zuzendutako prestakuntza-jarduerak, Bizkaian artisautza-azokak antolatzea, sektorea zabaltzeko eta sustatzeko ekintzak, sektorearen kudeaketa eta lehiakortasuna hobetzeko beste ekimen batzuekin batera.

Eskulangintza Sustatzeko 2025eko Programaren helburua da eskulangintzaren balorazioa handitzea, Bizkaiko gizartearen nortasun kultural, sozial eta ekonomikoaren zati integrala den aldetik, eta horren bidez, artisau-sektorea indartzeaz batera, merkatuan haren balorazioa sustatzea.

Eskabideak aurkezteko epea 2025eko apirilaren 22an hasi eta maiatzaren 16an amaituko da, eta Bizkaiko Foru Aldundiaren egoitza elektronikoan egingo da www.ebizkaia.eus helbidean.

Eskuartie, Udaberriko Azoka

Bihar, apirilaren 11n, hain zuzen, 12:00etan, Eskuartie, Udaberriko Azokaren inaugurazioa egingo da Bilboko Areatzan. Euskal Herriko Artisautza Tradizionala Sustatzeko Arbaso Elkarteak antolatutako ekitaldia da, eta laguntza-programa berriaren finantzazioa izan du 2024eko ekitaldian. Eskuartie hamaika egunez egongo da irekita, apirilaren 11tik 21era, biak barne.