Euskalmeten iragarpenaren arabera, Aste Santuko eguraldia aldakorra izango da

Ostegun Santua eta Ostiral Santua zertxobait eguzkitsuagoak izango dira goizean barnealdean

Euskalmet −Euskal Meteorologia Agentziak iragarri duenez, Aste Santuko eguraldia aldakorra izango da, eta une lasaiak ezegonkortasunak eta zaparradek markatutako beste une batzuekin tartekatuko dira. Aldi berean, tenperaturak gorabehera handiak izango ditu egun batzuetatik besteetara. Ostegun Santua eta Ostiral Santua barnealdean nahiko argiak eta lehorrak izango dira goizean, baina ostiralean euria egin dezake egunaren bigarren partean.

Euskalmeten arabera, gaur, asteartea, gainazaleko presio baxuen eta goi-geruzako aire hotzaren eraginez eguraldi nahasia eta ezegonkorra izango da, zaparradak sarri botako ditu eta tenperatura nabarmen jaitsiko da, elur-maila ere bai, eta gauean 1000-1200 m inguruan kokatuko da. Ez da baztertzen trumoi-ekaitzak izatea eta txingorra botatzea. Asteazken goizean Atlantikoko presio altuak gailentzen joango dira, eta egunsentia hotza izango da. Arabako zenbait lekutan izotza egin dezake. Egunaren bigarren partean euri zaparradak bota ditzake, eta berriz ere baliteke arratsaldean trumoi-ekaitzak izatea. Hala ere, elur-maila igo egingo da eta mendirik altuenetan geratuko da.

Osteguna 2025/04/17

Udaberriko giro atsegina izango dugu. Goizaldea freskoa izango da eta ez da baztertzen behe-lainoa sortzea barnealdeko haranetan, eta izotza egin dezake hegoaldeko zenbait lekutan. Bestalde, egunaren lehen partean euria egin dezake kostaldean, baina barnealdean ostarte zabalak irekiko dira goizean eta eguzkitsu egongo da. Hego-haizeak eraginda gora egingo dute bai tenperatura maximoek bai minimoek. Arratsaldean, haizeak iparrerantz eta ipar-ekialderantz egingo du.

• Tenperatura minimoa: 2-8 ºC.
• Tenperatura maximoa: 15-18 ºC

Ostirala 2025/04/18:

Egunsentiko behe-lainoa jasotakoan, goizean eguzkitsu egongo da. Baina haizeak hegoaldetik ipar-mendebaldera egingo du arratsaldean, eta, horren ondorioz, egunaren bigarren partean hodei trinkoak iritsiko dira, eta berriro ere euria egingo du. Trumoi-ekaitzak ere izan daitezke. Hala ere, tenperaturak gora egingo du.

• Tenperatura minimoa: 7-12 ºC
• Tenperatura maximoa: 18-22 ºC

Hurrengo egunetarako joera:

Hurrengo egunetarako meteorologia-ereduak ez datoz bat, baina litekeena da iparraldeko haizea nagusitzea. Horrela balitz, hodei ugari izango genuke, euria egingo luke, sarriago ipar isurialdean, eta giro freskoa izango genuke.

Oharra: Iragarpen eguneratuak jarraitzea gomendatzen da Euskalmet eta X bidez.