Imanol Pradales Lehendakariak eta Enrico Letta-k elkarrekin gogoeta egin dute Europaren etorkizunari buruz

Italiako lehen ministro ohi eta Europako industria berpiztearen oinarriak finkatzen dituen txostenaren egileak Euskadi bisitatu du ‘Europa. Última oportunidad’ (Europa. Azken aukera) liburua Lehendakariarekin batera aurkezteko

Imanol Pradales Lehendakariak Enrico Letta Italiako lehen ministro ohiarekin batera parte hartuko du Bilbon, ‘Europa. Última oportunidad’ (Europa. Azken aukera) liburuaren aurkezpenean. IE Universityk eta EITBk antolatutako ekitaldia 17:30ean izango da, EITBko multibox aretoan. Bertan, bi liderrek elkarrizketa irekia izango dute Europak agertoki global berrian dituen erronka handien inguruan.

Goizean, Lehendakariak harrera ofiziala egingo dio Enrico Lettari Ajuria Enean.

‘Europa. Última oportunidad’ Europako 65 hiritan bederatzi hilabetez egindako ibilbide luzearen emaitza da. Ibilbide horretan, Enrico Lettak 400 bilera baino gehiago egin zituen buruzagi politiko, enpresarial, sindikal eta sozialekin. Elkarrizketa horietatik abiatuta, egileak ‘Letta Txostena’ izenekoa idatzi zuen. Bertan, Europaren batasuna indartzeko eta merkatu bakarra modernizatzeko beharra planteatzen du, merkatu hori XXI. mendeko errealitate ekonomiko, sozial eta teknologikoetara egokitzea helburu hartuta.

Bere bidaian, Lettak Euskadi ere bisitatu zuen. ‘En Bilbao, ideas para simplificar la vida a las pequeñas y medianas empresas (PYME)’ —Bilbon, enpresa txiki eta ertainen (ETEen) bizitza sinplifikatzeko ideiak— izenburua daraman kapituluan, Imanol Pradalesekin izandako elkarrizketa nabarmentzen da. Bertan, Europan gaur egun dagoen arau- eta zerga-zatiketak ezartzen dituen oztopoak jorratu zituzten. Lettak “buruhauste gogaikarri” gisa deskribatzen du merkatu bakarra, Europako ETE askoren egunerokoa zailtzen duena.

Lehendakariak askotan aipatu du ‘Letta Txostena’ Europaren etorkizun ekonomiko eta industrialerako funtsezko dokumentuetako bat dela. “Europako industria berpizteak Euskadi bezalako naziorik gabeko estatuen ahotsa ere izan behar du” defendatu du, eta “Europako proiektua sakoneko eraldaketekin indartu” beharra azpimarratu du, Letta, Draghi eta Niinistö-ren txostenen ildotik.

Ikuspegi hori izan da oinarria, halaber, Euskal Finantza Aliantza bultzatzeko, BGAE, BBVA, Laboral Kutxa, Kutxabank, BBK Fundazioa, Kutxa Fundazioa, Vital, BasqueFik eta Elkargirekin batera. Euskadi lurralde industrial erakargarri gisa finkatzera bideratutako aliantza da, lankidetzako, errotzeko eta euskal enpresa-, teknologia- eta industria-sarearen hazkundearekiko konpromisoko esparru egonkor bat ezartzea eskatzen duena.