Eusko Jaurlaritzak estatutuak onartu ditu Lanbide zuzenbide pribatuko erakunde publiko bihurtzeko

Euskal Enplegu Zerbitzu Publikoak estatuto esparru moderno eta funtzional bat izango du horrela, Euskadin lan duinerako, enplegagarritasuna hobetzeko eta gizarte eta lurralde kohesiorako eskubidea erabat garatzen laguntzeko gaitasuna indartzen duena

Gobernu Kontseiluak Lanbide – Euskal Enplegu Zerbitzu Publikoaren estatutuak onartu ditu astearte honetan, zuzenbide pribatuko erakunde publikoaren konfigurazio juridikoa burutuz.

Era horretan, abenduaren 21eko 15/2023 Legearen 95. artikuluan xedatutakoa betetzen da. Artikulu horrek ezartzen du Eusko Jaurlaritzak dekretu bidez onartuko dituela Lanbide – Euskal Enplegu Zerbitzu Publikoaren estatutuak, gobernu organoen funtzioak, osaera eta izendapena garatuko dituztenak, bai eta erakundearen zerbitzuen egitura organikoa eta funtzionala eta funtzionamendu araubidea ere, enpleguaren eta inklusioaren arloan ikerketa, diseinu eta berrikuntza aplikaturako laguntza tekniko espezializatua bermatuko duena.

Onartutako estatutuek Lanbideren araubide juridikoa, organikoa eta funtzionala garatzen dute, eta gobernu organoen osaera, funtzioak eta izendapena arautzen dituzte, bai eta barne egitura eta funtzionamendu araubidea ere. Eta legean ezarritako printzipio gidariak txertatzen dituzte; hala nola, hierarkia, sinpletasuna, argitasuna, subsidiariotasuna, moldagarritasuna eta antolaketa gardentasuna.

Gainera, Euskal Enplegu Sarea, kolaborazio eta lankidetza tresna dena, sortzeak Lanbideren egitura organiko eta funtzionalaren antolaketa egoki egokitzea eskatzen du, bai eta gobernu organoen eremu funtzionala zehaztea ere, enplegu zerbitzuen kudeaketa eraginkorra ahalbidetzeko eta enpleguaren eremuan prestazio rola hartzen duten sareko erakunde guztien kohesioa eta koordinazioa bermatzeko.

Ildo berean, Inklusiorako eta Diru Sarrerak Bermatzeko Euskal Sistemaren abenduaren 22ko 14/2022 Legetik eta 15/2023 Legetik eratorritako helburuekin eta aginduekin lerrokatzen dira estatutuak, eta bi alderdiri erantzuten dion egitura funtzionala ematen diote erakundeari: enplegu zerbitzu publiko gisa eta prestazio ekonomikoak kudeatzen dituen erakunde gisa.

Estatutu testuak kontuan hartzen ditu Lanbidek 2/2009 Legearen bidez sortu zenetik izan duen bilakaera instituzionala, 3/2011 Legearen bidez erakunde autonomo bihurtu zenetik izan duen bilakaera eta 329/2010 eta 82/2012 Dekretuen bidez onartutako estatutuak. Zentzu horretan, proposamenak erakundearen antolamendua eguneratzen eta testuinguru sozioekonomikoaren eta arau arloaren eskakizun berrietara egokitzen du, erakundearen eraginkortasuna eta gaitasun operatiboa hobetzeko helburuarekin.

Dekretuaren eduki nagusia honako hau da:

• Gobernu organoen eginkizunak, osaera eta izendapen araubidea garatzea.
• Barne egituraren antolaketa eta funtzionamendu erregimena.
• Hierarkia, argitasun, subsidiariotasun, moldagarritasun eta gardentasun printzipioak indartzea.
• Administrazio Kontseiluaren eta erakundearen ohiko zuzendaritzaren zeregin estrategikoa zehaztea.
• Zuzendaritza betearazleak, laguntza zerbitzuak eta lurralde eta toki bulegoak antolatzea.

Azken batean, onartutako estatutuek estatuto esparru moderno eta funtzionala ematen diote Lanbideri, Euskal Autonomia Erkidegoan lan duinerako, enplegagarritasuna hobetzeko eta gizarte eta lurralde kohesiorako eskubidea erabat garatzen laguntzeko duen gaitasuna indartzeko.