Hezkuntza Sailaren Dirulaguntzen Plan Estrategikoa 150 milioi eurotik gorakoa da

Hezkuntza Sailaren 2025eko Dirulaguntzen Plan Estrategikoa, hiru sailburuordetzek kudeatutako dirulaguntzen deialdi guztiak jasotzen dituena, gaur onartu du Gobernu Kontseiluak. Planak 90.679.707 euroko inbertsioa dakar 2025eko ekitaldi honetarako, eta 60.182.143 euro gehiago 2026rako.

Hezkuntza Sailak 78 laguntza-lerro ditu gaur egun, eta horien zenbateko osoa 150.861.850.078 eurokoa da 2025. eta 2026. urteetarako. Horien artean, nabarmentzekoak dira eskolatzeko bekak eta laguntzak, hizkuntza-gaitasuna eta eleaniztasuna bultzatzea, bokazio zientifikoak eta artistikoak, kalitatezko indartze- eta irakaskuntza-programak garatzea… Era berean, Hezkuntza Sailaren diru-laguntza guztien artean garrantzi handia dute lehentasunezko jarduera-eremuetan sustatutako programa eta proiektuei zuzendutakoek, besteak beste, hezkidetzari, genero-indarkeriaren prebentzioari, bakeari eta bizikidetzari edo aniztasunarekiko arretari buruzkoek, hezkuntza-laguntzako premia espezifikoak dituzten ikasleei erantzuten dieten programak alde batera utzi gabe.

Plana programatikoa da, eta Hezkuntza Sailaren politika planifikatzeko tresna da, gizarte-intereseko jarduerak sustatzea helburu duten jardun-arloetan, diru-laguntzak emanez. Horrela, tresna horrek eraginkortasun eta efizientzia mailak handitzea bermatzen du, bai eta Euskal Hezkuntza Sistemaren esparruan gardentasuna indartzea ere.

Laguntzen zerrenda luzean aipa daitezke, halaber, irakasleak prestatzera bideratutakoak, ikerketa sustatzera bideratutakoak, LHko ikastetxeetarako ekipamendua erostera bideratutakoak edo udal-titulartasuneko eskola-instalazioak egokitzera bideratutakoak, besteak beste.