Ertzaintzako agenteek 20 eta 23 urteko bi gizon atxilotu dituzte goizaldean, Bilboko Abando auzoan egindako eraso baten ustezko egileak izatea leporatuta. Biktimetako batek ebakia zuen esku batean eta besteak kontusioak, jo egin baitute.
Gaur goizaldeko hiruak laurden gutxi aldera, Bilboko Abando auzoan zebilen Ertzaintzako patruila bati laguntza eskatu diote bi gizonek, pertsona talde batek eraso egin diela esanez.
Biktimen arabera, pertsona batzuek agirika egin diete, eta, ondoren, lagunetako bat jo dute. Laguna defendatzen saiatu direnean, erasotzaileetako batek labana bat atera du eta biktimetako bati eraso egin eta eskuan ebakia egin dio. Gainera, erasotzaileek laguna jotzen jarraitu dute, eta espaloian zaurituta geratu da.
Bertaratu den polizia-baliabideak osasun-laguntza eskatu du lurrean konortea erdi galduta zegoen gaztea artatzeko.
Agenteak susmagarrien bila hasi dira, eta handik laster aurkitu dituzte inguruko diskoteka baten inguruan, eta atxilotu egin dituzte.
Atxilotuei, 20 eta 23 urtekoei, lesio-delitua leporatu diete, horietako bati arma zuriarekin eraso egiteagatik. Bestalde, bi biktimak ospitalera eraman behar izan dituzte.
Atxilotuak Ertzaintzaren egoitzara eraman dituzte dagozkion polizia-izapideak egitera. Horiek amaitu ondoren, datozen orduotan jarriko dituzte agintari judizialaren eskuetan.