Eusko Jaurlaritzak Ibilgailuen Azterketa Teknikoa hilabete aurreratzeko deia egin die herritarrei, uda honetan pilaketarik ez izateko

Eusko Jaurlaritzako Industria, Trantsizio Energetiko eta Jasangarritasun Sailak dei egiten die datozen hilabeteetan ibilgailuen azterketa teknikoa iraungitzen zaien ibilgailuen titularrei 30 egun natural aurrera dezaten ibilgailuen azterketa teknikoa. Helburua da udako hilabeteetan ibilgailuen azterketa teknikoa egiteko Euskadiko estazioetan espero den azterketa-eskari handia arintzea.

Hala, ibilgailuen azterketa teknikoa maiatzean iraungitzen zaienek apirilean eska dezakete azterketa, eta ekainean amaitzen zaienek, berriz, maiatzera aurreratu dezakete. Horrela, ekainean egin ahal izango da udako hilabeteetan espero den pilaketa handiaren zati bat. Horretarako, Industria Sailak gogorarazi nahi die herritarrei ibilgailuen azterketa hilabete aurreratu daitekeela Euskal Autonomia Erkidegoan banatuta dauden ibilgailuen azterketa teknikoa egiteko 12 estazioetako edozeinetan. Estazio guztien zerrenda euskadi.eus/iat webgunean kontsulta daiteke.

Azterketa aurreratzea, balio-data aldatu gabe

Ibilgailuen azterketa teknikoa arautzen duen urriaren 23ko 920/2017 Errege Dekretuak aukera ematen du ibilgailuen azterketa teknikoaren azterketa-data 30 egun natural aurreratzeko, azterketaren baliozkotasunaren amaiera-data aldatu gabe. Hau da, azterketa 30 egun aurreratzeagatik ez dira hurrengo azterketarako balio-egunak galtzen, eta jatorrizko iraungitze-data mantentzen da.

Adibide gisa, ibilgailuen azterketa teknikoa 2 urtean behin egin behar duen ibilgailu bati indarrean duen ibilgailuen azterketa teknikoa 2025eko maiatzaren 15ean amaitzen bazaio eta azterketa teknikoa 2025eko apirilaren 16tik maiatzaren 15era bitartean egiten bazaio, eta azterketa horretan aldeko emaitza lortzen badu, aldizkako azterketa horren balio-data 2027ko maiatzaren 15era arte mantenduko da.

Bestalde, gogorarazten da derrigorrezkoa dela ibilgailuen azterketa teknikoa indarrean izatea, bide publikoetako ezbehar-tasa murrizteko eta pertsonak eta ingurumena babesteko neurri gisa.