Ertzainek 19 eta 37 urteko bi gizon atxilotu dituzte eta 49 urteko emakume bat ikertu dute osasun publikoaren aurkako delitu bat eta intrusismo profesionala leporatuta, dagokion titulaziorik izan gabe eta kolegiatu gabe tratamendu estetikoak egiteagatik, bai eta homologatu gabeko sendagaiak erabiltzeagatik ere.
Bi gizonak atzo arratsaldean atxilotu zituzten Bilboko Alde Zaharreko estetikako kontsulta batean. Ertzaintzak polizia-dispositibo bat ezarri zuen Bizkaiko Medikuen Elkargoaren salaketaren bidez jakin ondoren ustezko bi doktorek tratamendu estetikoak egin behar zituztela Bizkaiko hiriburuko kontsulta batean. Ustezko bi medikuek “errusiar ezpainak” izeneko teknikan espezialistak zirela jakitera ematen zuten sare sozialetan, zegokion titulaziorik izan gabe eta kolegiatuta egon gabe.
Ertzaintzaren baliabideak kontsultara joan ziren eta ikuskapena egin zuten, eta egiaztatu zuten lokalaren arduraduna eta 19 eta 37 urteko bi gizon zeudela bertan, tratamendu estetiko batzuk egiteko prest.
Agenteek egiaztagiri profesionalak eskatu zizkieten, eta ez zituztela egiaztatu zuten. Gainera, geletan hainbat botika aurkitu zituzten emateko prestatuta, nahiz eta zegozkien osasun-kontrolik ez izan. Ebidentzia horien aurrean, agenteek bi gizonak atxilotu zituzten osasun publikoaren aurkako delitu bat eta intrusismo profesionala leporatuta. Kontsultaren arduraduna, 49 urtekoa, ikerketapean geratu zen delitu berberengatik.
Polizia-eginbideak amaitutakoan, atxilotuak agintari judizialaren eskuetan jarriko dituzte datozen orduetan.