Beurko-Bagatzako kulturgune berria sortzeko lanak abian dira

Kultura-ekipamendu berri horri esker, auzoak kultura-jardueretarako, bileretarako, auzo-elkarteetarako, haurrentzako jardueretarako, unean uneko erakusketetarako… lekua izango du. Kulturgunea BAI dagoen eraikinaren beheko solairua erabiliz sortuko da (Arauti, 5), eta 388 metro koadro izango ditu. Gainera, eraikinean igogailu bat sortuko da antzerki eskolaren irisgarritasuna hobetzeko.

Beurko-Bagatzak laster izango du martxan Kulturgune berria. Barakaldoko Udalak auzoko kultur zerbitzuak handitzeko obrak hasi ditu, Kulturgune bat sortuz, 1,3 milioi euroko inbertsioa eginez. Kultur gune berria orain BAIk, Bizkaiko Antzerki Ikastegiak, hartzen duen eraikinaren etxabean sortzen ari da, Arauti kaleko 5. zenbakian.

Bagatzako kultur gune berriak 388 metro koadro izango ditu. Zehazki, gaur egun BAIk hartzen duen eraikinaren azpian dagoen espazio hutsa aprobetxatuko da. Horrela, trenkadak eta panel mugikorrak jarriko dira hainbat espazio sortzeko eta lokalak hartuko dituen funtzioetara egokitu ahal izateko: kultur jarduerak, bilerak, auzo-elkarteen jarduerak, haurrentzako jarduerak, erakusketa puntualak… Kasu honetan, Lutxanakoarekin alderatuta, ez da ikasketa-gelarik egongo, Minas eraikinean horretarako ekipamendu espezifikoa baitugu, ondoan dagoena.

Proiektuak BAIren eraikinean igogailu bat jartzea ere aurreikusten du, gaur egun igogailurik ez duena. «Eraikinean obra egingo dugula aprobetxatuz, igogailua jarriko dugu eskolan, zerbitzuaren irisgarritasuna hobetzeko. Eskolaren aldarrikapen historikoa da eta azkenean errealitate bat izango da «, iragarri du Jon Andoni Uriak. Obrek 10 hilabete inguruko iraupena dute, eta Bai Eskolak eta Zirkodomoak programazioa aldatu dute, Clara Campoamorren eta Udalaren Musika Partzuergoan eskolak emanez edo ikasturteko azken tailerrak bertan behera utziz, hurrenez hurren.

4,6 MILIOI INBERTITU DIRA KULTURA-EKIPAMENDUAK HOBETZEKO

Jarduera hau Amaia del Camporen taldea kultur guneak modernizatzeko egiten ari den prozesuaren parte da, eta orain arte 4,6 milioi euro baino gehiago inbertitu dira, Bagatzaren proiektu berria barne. Zehazki, honako proiektu hauek biltzen dira, besteak beste: liburutegi eta kultur etxe guztiak Wifiz hornitzea, Clara Campoamorreko eta Gurutzetako gizarte-etxeak berritzea, Retuertoko kultur etxeko irisgarritasuna hobetzea, Artegabeitiako liburutegia osorik berritzea eta Lutxanako Kulturgunea sortzea.