Donostian gizon bat atxilotu dute kale erdian emakume bati lapurreta egiteko eraso egiteagatik. Gizonak emakumearengandik urruntzeko agindua zuen indarrean.

Ertzainek 59 urteko gizon bat atxilotu dute, kalean emakume bati, bere gauzak lapurtzeko, eraso egitegatik. Biktima erasotzailearen ezaguna da, ez da eraso egiten dion lehenengo aldia, eta bost aldiz urratu du harengandik urruntzeko epailean agindua.

Zerbitzutik kanpora zegoen ertzain batek ikusi zuen joan den igandean Donostiako Gernikako Arbolaren Pasealekuan indarkeria erabiliz egindako lapurreta. Erasotzaileak emakumea lepotik eta beso batetik helduta eta horma baten kontra estututa zuen. Agenteak haiengana hurbildu eta gizona apartatu zuen, eta eskuetan biktimaren telefono mugikorra eta diru-zorroa zituela ikusi zuen.

Egoera kontrolpean izan zuenean eta patruila bat bertaratu zenean, agenteek egiaztatu zuten erasotzailea berrerorlea zela, eta Donostiako Epaitegi batek emandako urruntze-agindu bat zuela indarrean. Hori dela eta, indarkeria erabiliz lapurreta egitea eta emakumearen aurkako indarkeriaren esparruko neurri bat urratzearen delitua leporatuta atxilotu zuten.  

Polizia-aurrekarien arabera, erasotzailea eta biktima elkarrekin bizi izan dira emakumearen etxean, Gipuzkoako hiriburuan, eta mehatxu, koakzio eta tratu txar egoerak izan ondoren, Ertzaintzak hainbat atestatu bideratu zituen eta genero-indarkeriako espediente bat aktibatu zuen.  

Azken hilabete hauetan, gizona bost aldiz ikertu edo atxilotu dute biktima babesteko emandako agindu judiziala behin eta berriz urratzeagatik.

Atxilotua atzo, astelehena, jarri zuten Donostiako Guardiako Epaitegiaren eskuetan, eta epaileak espetxeratzeko agindua eman zuen.