Osakidetzako fisioterapeutek aholkatzen dute dieta egokia indar-ariketekin konbinatzea 50 urterik gorako emakumeen osasuna hobetzeko

• Berrogeita hamar lagunek parte hartu dute Barakaldoko Udalak eta Osakidetzak Emakumeen Osasunaren aldeko Ekintzen Nazioarteko Egunean antolatu duten «50 urtetik gora ere sasoian egoteko indar-ariketak eta elikadura» tailerrean
• Eusko Jaurlaritzako Osasun Sailak eta Osakidetzak osasuna sustatzearen eta gaixotasuna prebenitzearen aldeko apustua egin dute, ohitura osasungarriak bultzatuz eta herritarrak ahaldunduz bere osasunaren zaintzan

Osakidetzako Barakaldo-Sestao ESIko bi fisioterapeutak, Araitz Garaikoetxea fisioterapeuten gainbegiraleak eta Ana Anguiano San Vicenteko Osasun Zentroko Lehen Mailako Arretako fisioterapeutak, «50 urtetik gora ere sasoian egoteko indar-ariketak eta elikadura» tailerra eman dute gaur, Barakaldoko Udalak eta Osakidetzak antolatuta, Emakumeen Osasunaren aldeko Ekintzen Nazioarteko Ekintza Egunean.

Eusko Jaurlaritzako Osasun Sailak eta Osakidetzak osasunaren sustapena eta gaixotasunaren prebentzioa sustatzeko duten konpromisoaren erakusgarri da jardunaldi hau, ohitura osasungarriak bultzatuz eta herritarrak bere osasunaren zaintzan ahaldunduz.

Emakumeen gorputza 40 urtetik aurrera hasten da aldatzen, eta pixkanaka indarra eta muskulu-masa, hezur-dentsitatea eta tasa metaboliko basala murrizten dira. Horregatik, gaurko saioan, Osakidetzako fisioterapeutek ariketa erregularrarekin konbinatutako dieta egoki baten alde egin dute, osasuna eta ongizatea sustatzeko.

Tailerra Barakaldoko Clara Campoamor Zentro Zibikoan egin da, eta 50 urtetik gorako emakumeengan indar-ariketak egitearen garrantziari buruzko zati teoriko batekin hasi da. Ana Anguiano fisioterapeutak hala ziurtatu du: «ebidentzia zientifikoa dago ariketa dela bizitzako etapa honetan eragin handiena duten gaixotasunak prebenitzeko eta tratatzeko neurririk onena». Gainera, beharrezko proteinak dituen dieta bat mantentzeko jarraibideak ere eman dituzte profesionalek, «proteinetan aberatsak diren dietek ariketa fisikoak ematen duen onura indartzen dute eta zahartze osasuntsua bultzatzen dute», gaineratu du Araitz Garaikoetxeak.

Gainera, 50 parte-hartzaileek fisioterapeutek gainbegiratutako indar-ariketa praktikoak egin dituzte: «ezinbestekoa da ariketa aerobikoa indar-ariketarekin konbinatzea, betiere emakumearen bizitzako etapa honetako aldaketetara egokituta», adierazi dute profesionalek.

IV. EDIZIOA

2008tik, Barakaldoko Udalak urtero egiten du jardunaldi hori Emakumeen Osasunaren aldeko Ekintza Eguna ospatzeko, hitzaldiak, jardunaldiak edo tailerrak eginez. 2022tik aurrera, Osakidetzak, Barakaldo-Sestaoko ESIarekin, osasun-profesionalen bitartez, emakumeen osasuna  edo sexualitatea menopausiaren ondoren bezalako gaiak lantzen laguntzen du. Jardunaldiek parte-hartze handia izan dute beti.