Euskadiko erreferentziazko profesional soziosanitarioak protagonista izan dira Osasun Sailak arreta integratuago baterantz aurrera egiten jarraitzeko antolatutako III. Topaketan

Hirugarren edizio honek arreta soziosanitarioan inplikatutako sistemen eta eragileen arteko elkarreragingarritasuna du ardatz, pertsona helburu duen zaintza-eredu bat finkatzea ahalbidetuko duen zeharkako tresna teknologiko gisa, komunitatean eta etxean pertsona horrenganako arreta areagotzeko, autonomia pertsonala, prebentzioa eta sistemen arteko koordinazioa sustatuz 

Eusko Jaurlaritzako Osasun Sailak antolatutako Euskadiko Erreferente Soziosanitarioen III. Topaketak esparru horretako ehun profesional baino gehiago bildu ditu gaur Gasteizen.

Jardunaldi tekniko honen helburua da euskal erakundeek arreta soziosanitario integratuagoa, efizienteagoa eta pertsonengan oinarritua lortzeko konpromisoan aurrera egiten jarraitzea.

Hala adierazi du Osasun Saileko Arreta Soziosanitarioko zuzendari Mamen Alvarezek foro honen hirugarren edizioari hasiera emateko hitzaldian. Foroa esperientziak partekatzeko eta, ikaskuntza eta etengabeko hobekuntzaren ikuspegitik, koordinazio soziosanitarioa indartzeko topagune eta gogoetarako gune gisa sortu zen.

Hirugarren edizio hau Eusko Jaurlaritzaren egoitza nagusian egingo da. Topaketa elkarreragingarritasunean zentratzen da berariaz, hau da, informazioa trukatzean, pertsonari emandako zerbitzuaren kudeaketa hobetzeko eta horrekin lotutako administrazio-prozesuak arintzeko.

Mamen Alvarezek azpimarratu duenez, une erabakigarri batean gaude, elkarreragingarritasuna tresna teknologiko indartsu bat izatetik, Euskadiko Estrategia Soziosanitarioan ezarritako helburua lortzea ahalbidetuko digun palanka eraldatzailea izatera igaro behar baita. Helburu hori pertsona ardatz duen zainketa-eredu bat lortzea da, komunitatean eta etxean arreta areagotuko duena, autonomia pertsonala, prebentzioa eta sistemen arteko koordinazioa sustatuz.

Ildo horretan, Arreta Soziosanitarioko zuzendariak nabarmendu du erreferente soziosanitarioek funtsezko zeregina dutela zainketen ekosistema egituratzeko eta arreta integratua eta kalitatekoa bermatzeko.

Era berean, Alvarezek gogoratu du Euskadik apustu argia egin duela Datu Sanitarioen Europako Esparrua elikatzeko, pertsonek beren osasun-datu elektronikoei, asistentziaren jarraitutasunari eta pazientearen segurtasunari berari buruzko kontrol handiagoa izan dezaten ziurtatuko duen esparru juridiko gisa.