Vitoria-Gasteiz, bi atxilotu eta lau ikertu labanekin eta beste objektu arriskutsu batzuekin borrokan aritzeagatik

Ertzainek 23 eta 48 urteko bi gizon atxilotu dituzte bart gauerdian Gasteizen lesio-delitu bat leporatuta, eta ikertu gisa eginbideak ireki dizkiete beste lauri liskar nahaspilatsu batean ustez parte hartu izanagatik. Borrokan ez da zauritu larririk izan.

Ertzaintzaren patruilak Gasteizko Cubo kalera joan dira, larunbat gaueko 23:30 aldera hainbat pertsona borrokan ari zirela jakin ondoren. Agenteak iritsi direnean, giroa lasaituta zegoen eta ez zegoen zauritu larririk.   

Inplikatuetako batek ebakiren bat zuen bizkarrean, beste bi odola dariola zeuden esku batean edo beso batean zituzten zauri edo ebakietatik, baina larritasun handirik gabe. Pertsona bakarra eraman dute anbulantzian ospitalera laguntza jasotzeko.

Ertzaintzaren baliabideek sei pertsona identifikatu dituzte gertakarian inplikatu gisa, eta ustez borrokan erabili dituzten arma zuriak eta objektu arriskutsuak atzeman dituzte, zehazki atari batean aurkitu dituzten bi labana, muturrean torlojuak zituen eta ibilgailu baten azpian aurkitu duten egurrezko makila bat eta metalezko txakur-uhal bat.  

Ertzainek lekuan bertan egindako ikerketaren ondorioz, bi pertsona atxilotu dituzte ustezko lesio-delitua leporatuta, eta liskar iskanbilatsuan inplikatutako beste lauak inputatu dituzte edo ikerketapean geratu dira.

Atxilotuak polizia-egoitzan egongo dira Gasteizko Guardiako Epaitegiaren eskuetan jarri arte.