Ertzaintzak 18 urteko gazte bat atxilotu du gaur, igandea, goizaldean, Muxikan (Bizkaia), sexu-eraso delitu bat egotzita, San Roman auzoko jaietan bost neska adingaberi ukituak egiteagatik. Akusatua ertzain-etxera eraman dute, epailearen esku utzi aurretik beharrezko eginbideekin jarraitzeko.
Gertakariak gaur, igandea, goizaldean izan dira, Muxikan (Bizkaia), San Roman auzoko jaiak direla eta.
Goizaldeko ordu bata aldera, Ertzaintzari deitu diote, San Roman auzoko jai-esparrura joateko. Izan ere, abisu bat jaso dute, gizon batek sexu-ukituak egin dizkiela esanez.
Gernika-Lumoko ertzain-etxeko agenteak jai-eremura bertaratu dira, eta biktimetako batek emandako datuekin gazte bat aurkitu dute. Gazte hori jai-eremutik baztertu eta gune seguru batera eraman dute, behar bezala identifikatzeko.
Ekintza horretan, hainbat gazte ertzainengana hurbildu dira, sexu-eraso baten biktima izan direla salatzeko. Eraso horretan, atxikitako pertsonak ukituak egin dizkie.
Adingabeek eta gertakarien hainbat lekukok ahoz egindako adierazpenen aurrean, Ertzaintzak 18 urteko gaztea atxilotu du, bost adingaberi sexu-erasoa egitea egotzita.
Ustezko sexu-erasotzailea ertzain-etxera eraman dute, beharrezko eginbideekin jarraitzeko. Horiek amaitutakoan, atxilotua epailearen aurrean aurkeztuko dute.