- Eusko Jaurlaritzak bultzatu du instalazioa, EEEren, Arabako Foru Aldundiaren eta Krean enpresa sustatzailearen bitartez
- Etxebarri-Ibiñan dago kokatua, eta guztira 1,25 MWp-ko potentzia instalatua du, 600 etxebizitza baino gehiagoren beharrak asetzeko ahalmenarekin
- Energia-kooperatibak herritarren auto-hornikuntza ahalbidetzen du, eta herritarrek parkeak sortzen duen energia elektrikoaren % 100en jabe dira
Ekiola Gorbeialdea, Arabako Etxebarri-Ibiña kontzejuan dagoen energia ekoizteko kooperatiba, energia elektriko berriztagarria ekoizten hasi da, sarera konexioa osatu ondoren.
Mikel Jauregi Industria, Trantsizio Energetiko eta Jasangarritasuneko sailburuak eta Ramiro González Arabako ahaldun nagusiak eguzki-parke fotovoltaikoa inauguratu dute, Irantzu Allende Trantsizio Energetikoko sailburuordearekin, Saray Zarate Garapen Ekonomikoko eta Berrikuntzako foru diputatua, Mikel Amundarain Energiaren Euskal Erakundeko zuzendari nagusiarekin eta Asier Etxabe Krean sustapeneko zuzendariarekin batera.
Gorbeialdeko eguzki-parkeak 1,25 MWp-ko (megawatt puntako) potentzia instalatua du, bazkide kooperatibistak hornitzeko 2.100 eguzki-panel fotovoltaikoei esker. Kalkulatzen da energia-ekoizpena 1.615 MWh/urte dela.
Eusko Jaurlaritzak, Arabako Foru Aldundiak eta EKIOLAk (Energiaren eta Krean Euskal Erakundearen Sozietatea) sustatutako proiektu honek 1,15 milioi euroko inbertsioa egin du guztira, eta Europako funtsen finantzazioa jaso du; zehazki, Suspertze eta Erresilientzia Mekanismoen finantzazioa, CE Implementa-ren bidez.
Orain arte, 130 bazkide kooperatibista baino gehiagok egin dute bat ekimenarekin, eta beren etxeko kontsumoaren baliokidea den energia-bolumena eman ahal izango dute; etxebizitza bakoitzeko, batez beste, 2.000 euroko ekarpena egingo dute.
Mikel Jauregi Industria, Trantsizio Energetiko eta Jasangarritasuneko sailburuak nabarmendu duenez, horrelako ekimenak “bat datoz exekutiboak ezarritako helburuekin, ekonomia deskarbonizatzeko eta auto-hornikuntza eta subiranotasun energetikorantz eboluzionatzeko. Erakundeek bultzatzen ari garen trantsizio energetikoaren ereduarekin herritarrak berak modu aktiboan konprometitzen direla erakusten duen adibide bikaina da Ekiolarena”.
Ramiro Gonzalez ahaldun nagusiak azpimarratu duenez, ekimen horiei esker “urrats tinkoz egiten dugu aurrera, Arabako herritar bakoitzak Ekiola batera konektatzeko aukera izan dezan. Horrela, lurralde osoko 2.400 familiaren energia-kontsumoaren beharrak ase ahal izango dira. Gure helburua da herritarrek aukera izan dezatela beren ingurune hurbilean energia berde, berriztagarri ekoizle eta kontsumitzaile izateko, gure auto-hornikuntza eta ahalmen energetikoa areagotzeko”.
Arabak, gaur egun, lau Ekiola proiektu ditu garapen fase ezberdinetan. Ekiola Mendialdea izan zen Euskadin energia elektrikoa ekoizten hasi zen lehen eguzki-kooperatiba. Maeztun dago, eta 2023ko amaieratik sortzen du energia berriztagarria.
Bestetik, Aguraingo Lautadako Ekiola, dagoeneko abian dagoena, eta Amurrioko Aiarako Ekiola, azken garapen-fasean eta dagokion gizarteratze-fasean murgilduta dagoena. Azken fase horren helburua da herritarrak eta saltoki txikiak auto-hornikuntzarako eguzki-energiaren ekoizpena kudeatuko duten kooperatibetara erakartzea eta horietan sartzea.
Ekiolari buruz
Ekiola Eusko Jaurlaritzaren (Energiaren Euskal Erakundearen bitartez) eta Mondragon Korporazioko Krean ingeniaritza sustatzailearen arteko lankidetza publiko-pribatuaren emaitza da.
Ekimena 2021ean abiatu zen, energia-komunitateak sortzeko helburuarekin, eta herritarrek berek sortzen dute beren beharrak asetzeko behar duten energia elektrikoaren % 100. Gainera, kooperatibek lege-tresna gisa funtzionatzen dute energiaren etorkizunari beren planteamenduen arabera aurre egiteko, eta beren kideek ez dute beren etxeko instalazio elektrikoaren inolako alderdirik aldatu behar.
Euskal Autonomia Erkidegoan, gaur egun, 10 ekiola daude martxan edo sarera konektatzear: 5 Gipuzkoan, 4 Araban eta 1 Bizkaian.
Ekiola proiektuak barne hartzen duen eguzki-kontsumoko kooperatiben multzoak guztira 12,5 MWp-ko potentzia instalatua du, eta Euskadiko 6.000 etxe ingururen beharrak asetzeko gai da.