Bizkaia Ondarearen Europako Jardunaldien erdialdera heldu da, 140 jarduera baino gehiago eginda, eta 100 baino gehiago egiteko

Bizkaia Ondarearen Europako Jardunaldien 25. edizioaren erdialdera heldu da, eta inoizko zabalena eta parta-hartze handienekoa ari da izaten. Ekintzaz beteriko bi astetan doako 140 kultura-jarduera baino gehiago egin dira, eta oraindik beste 100 proposamen baino gehiago geratzen dira, hilaren bigarren hamabostaldian gozatzeko.

Aurten, Bizkaiko Foru Aldundiak koordinatutako kultura-programak 250 jarduera baino gehiago bildu ditu guztira, 160 erakundek antolatuak (udalak, kultura-elkarteak eta museoak), lurraldeko 76 udalerritan. Proposamen askotariko eta aberatsen bidez, herritarrek gertuagotik ezagutu ahal izango dituzte Bizkaiko arkitektura eta ondarea; hain zuzen, bisita gidatuak, tailerrak, erakusketak, ibilbideak, jarduera artistikoak eta gaikako topaketak egongo dira.

Oraindik egin ez diren jardueren artean, aipatzekoak dira herri hauetako auzo historiko eta enblematikoetan egingo diren hitzaldi, bisita gidatu eta ibilbide gidatuak: Arantzazu, Arrigorriaga, Barakaldo, Basauri, Bilbo, Bermeo, Ea, Elorrio, Gamiz-Fika, Gautegiz Arteaga, Gernika-Lumo, Getxo, Iurreta, Mañaria, Loiu, Ortuella, Otxandio, Plentzia, Portugalete, Santurtzi, Urduña, Zamudio, Areatza, Ispaster, Kortezubi, Lanestosa, Ondarroa, Orozko, Otxandio, Sopuerta, Karrantza, Zeanuri, Aulesti, Berriatua, Zaldibar, Balmaseda, Durango eta Markina-Xemein. Aipatutako horiez gain, arkitektura garaikideari eta industria-ondareari buruzko ibilbideak eta jarduera bereziak ere egingo dira.

2025eko edizioan mende laurdeneko kultura-ondarearekiko konpromisoa bete da, eta tradizioaren eta modernitatearen arteko elkarrizketan jarri da arreta. Ondare historikoa eta arkitektura garaikidea nabarmentzen dira, azken ehun urteetako eraikinei eta espazioei arreta berezia jarrita. Halaber, aurten «lurralde gonbidatua» sartu da, Kantabria, eta Bizkaiarekiko kultura-truke aberasgarrian parte hartzen ari da.

Programa osoa kontsultatzeko eta erreserbak egiteko, herritarrek webgune ofizialera jo dezakete: www.ondareabizkaia.eus.

25 urte kultura eraikitzen Bizkaian

Bizkaiak Ondarearen Europako Jardunaldien etengabeko koordinazioaren 25. urteurrena ospatzen du 2025 honetan. Kultura-programa hori euskal kulturaren arloko ondare-ekitaldi garrantzitsuenetako bat izatea lortu du.

Bizkaiko Foru Aldundiak koordinatutako ahalegin kolektiboak lankidetza-sare sendoa osatu du, eta Bizkaia erreferentziazko ondare-komunitate gisa finkatu du; Europaren onespena ere jaso du.

Gaur egun, 200 eragilek baino gehiagok parte hartzen dute, eta, horrela, kultura-ondarea zabaltzeko, balioesteko eta kontserbatzeko konpromiso kolektibo eta zeharkakoa islatzen da.

Jardunaldiok ondarea babesteko, ikertzeko, zabaltzeko eta kontserbatzeko ekimenak sortzea sustatu dute, eta kezka komun bat partekatzen duten eragile askoren arteko interakzioa sustatu dute: ondare-balioak zaintzea eta zabaltzea.

Edizio bakoitzerako gai desberdin bat proposatu izan denez, ondarearen ezagutzan sakondu ahal izan da hainbat ikuspegitatik: tipologiak, testuinguru historikoak, sortzaileen pentsamoldea eta ondarea kontserbatzearen garrantzia. Hautaketa tematiko horrek ondarearen kontzeptuaren beraren eta hura osatzen duten elementuen bilakaera islatu du. Orain ohikoak diren kontzeptuak, hala nola ondare immateriala, paisaia, lurraldea eta ondare-komunitateak, ezezagunak ziren duela 25 urte.