DonostiakoUdalak zakarrontzi trinkotzaileen instalazioa zabaldu du

Donostiako Udalak eguzki-paperontzi adimendunen sistema handituko du datorren asteartean, hilak 28, Portuko sarreran, Cervantes plazan, Boulevardean eta Loiola kalean biltzeko lau uharte berri instalatuz. Jarduketa hori, guztira 68.044,80 €-ko inbertsioarekin, hiri-altzariak modernizatzeko eta joan-etorri handiko espazioetako hondakinen kudeaketa hobetzeko udal-estrategiaren parte da.

Instalatutako paperontzi berriek, Bigbelly SMART MAX modeloak, Future Streetek eta Sulo Ibericak garatuak, trinkotze automatizatuko teknologia dute, 120 litroko ohiko zakarrontzi batek baino bost aldiz hondakin gehiago biltegiratzeko aukera ematen duena. Lau frakzio (ontziak, papera, organikoa eta gainerakoak) gaika biltzeko diseinatuta daude, eguzki-energiaren bidez funtzionatzen dute eta sentsore infragorriak dituzte betetze-maila denbora errealean monitorizatzeko. Konexio digitalari esker, urrunetik kudea daitezke, biltzeko ibilbideak optimizatuz. Diseinu trinkoak, irisgarriak eta ertzik gabekoak hiri-inguruneko integrazioa hobetzen du, eta mugikortasun urriko pertsonen erabilera segurua bermatzen du.

Carlos García Hiri Mantentze eta Zerbitzuetako zinegotziak azpimarratu duenez, «paperontzi adimentsu horiek bide publikoan hondakinen kudeaketan jauzi kualitatiboa emateko aukera ematen digute. Garbitasuna hobetzeaz gain, birziklapena sustatzen dute, baliabideak optimizatzen dituzte eta hiri-paisaia ordenatuagoa lortzen laguntzen dute. Lanean jarraitzen dugu Donostia jasangarriagoa, modernoagoa eta etorkizuneko erronkei aurre egiteko prestatuagoa izan dadin».

Ekimen honen bidez, Udalak hiri-iraunkortasunarekin, zerbitzu publikoen eraginkortasunarekin eta herritarren ingurunea hobetzearekin duen konpromisoa indartzen du.