Gazteen emantzipaziorako «Gaz» zerbitzuak eta Secot-ek hezkuntza ekonomiko-finantzarioko doako ziklo bat jarri dute abian gazteentzat

• Prestakuntza praktikoa eta osagai sozial indartsua uztartzen dituen ekimena da: belaunaldien arteko topaketa.
• Programa honek belaunaldien arteko elkartasuna eta Euskadi kohesionatuarekiko konpromisoa adierazten ditu, non adinekoen esperientzia gazteentzako aukera-eragile bihurtzen den.
• Saioak erabat doakoak izango dira, eta urriaren 27tik abendura bitartean egingo dira, aurrez aurre, Euskadiko hiru GAZ bulegoetan — Barakaldo, Bilbo eta Gasteiz —, bai eta telematikoki ere, edozein lekutatik parte hartzea errazteko.

Eusko Jaurlaritzako Gazteria eta Emantzipazio Zuzendaritzak eta Barakaldoko Udaleko Gazteria Arloak lan-ildo berri bat aurkeztu dute, gazteak ibilbide luzeko profesional seniorren ezagutzarekin lotuko dituena: ekonomiari eta finantzei buruzko prestakuntza- eta aholkularitza-programa bat, independentziarako lehen urratsak ematen ari direnei tresna praktikoak emateko pentsatua.

Ekimena honako hauen arteko lankidetzatik sortu da: GAZ, Eusko Jaurlaritzako Gazteria Zuzendaritzaren emantzipazio-zerbitzua, gazteei laguntza eta orientazio pertsonalizatuak (aurrez aurrekoak eta online) eskaintzen dizkiena prestakuntzaren, enpleguaren, etxebizitzaren eta ongizatearen arloetan, haien autonomia errazteko, eta SECOT, esperientzia modu altruistan partekatzen duten profesional seniorrek osatutako boluntariotza-elkartea, gazteen, ekintzaileen eta erakundeen garapena bultzatuz.

Finantza-ikaskuntzatik harago, lankidetza horrek belaunaldien arteko topagune bat sustatzen du: adinekoek beren bizi-ezagutza eta -esperientzia ematen dute, eta gazteek, berriz, begirada berritzailea eta ekonomia eta kontsumoa ulertzeko modu berriak ematen dituzte.

Azken batean, elkarrekin gizarte kohesionatuagoa eraiki nahi da, elkarrekiko errespetuan eta adinen arteko lankidetzan oinarritua.

«Bizi-proiektu bat markatzen duten erabakiez ari gara: aurrekontu bat administratzea, kontratu bat ulertzea, aurrezki bat planifikatzea edo kreditu bat baloratzea. Programa honekin, gazteen eskura jartzen dugu hamarkadetan erronka horiek bizi izan dituzten eta kudeatu dituzten pertsonen laguntza «, adierazi du Eusko Jaurlaritzako Gazteria eta Emantzipazioko zuzendari Adrian Lopez Sarachagak.

«Programa honekin, finantzez ez ezik, belaunaldien arteko elkartasunaz ere hitz egiten dugu», adierazi du Eusko Jaurlaritzako Gazteria eta Emantzipazioko zuzendari Adrian Lopez Sarachagak. «Saio bakoitza aukera bat da belaunaldi desberdinek jakintzak, esperientziak eta balioak parteka ditzaten. Gazteen emantzipazioa lehen mailako gizarte-erronka den une honetan, lotura horiek indartzea ere Euskadiren kohesioa indartzea da «.

Jonatan Martinen ustez, Barakaldoko Udaleko Gazteriako zinegotzia, «belaunaldien arteko ekintzaren adibide argia da: lanbide-esperientzia dutenen jakinduria aukera-palanka bihurtzen da gazteentzat, askotan ez baitute izan finantzak modu hurbil eta praktikoan ikasteko espaziorik».

Saioek – tailer eta aholkularitza formatuan – egunez egun aplikatutako ekonomia- eta finantza-hezkuntzaren oinarriak jorratuko dituzte: nola antolatu diru-sarrerak eta gastuak, nola interpretatu oinarrizko kontzeptuak, nola prebenitu gainzorpetzea, nola hartu kontsumoari buruzko erabaki informatuak eta nola finkatu aurrezpenerako eta, hala badagokio, ekintzailetzarako oinarriak. Prestakuntza-edukiez gain, programak banakako kontsulta- eta orientazio-espazioak aurreikusten ditu zalantza zehatzetarako.

Non eta nola parte hartu

Saioak GAZ Barakaldo, GAZ Bilbao eta GAZ Vitoria-Gasteizen izango dira, eta urrutiko konexioa nahiago dutenentzat online eskaintza bat ere izango da.

Lehenengo tailerra Barakaldoko GAZ bulegoan egingo da, eta oinarrizko finantza-hezkuntzari buruzkoa izango da. Honakoa da heziketa-zikloaren egutegia:

GAZ bulegoa	Data	Ordua
Barakaldo	Urriak 27	17:30
Bilbao	Urriak 28	17:30
Vitoria-Gasteiz	Urriak 29	17:30
Online	Azaroak 5	18:00
Barakaldo	Azaroak 24	17:30
Bilbao	Azaroak 26	17:30
Vitoria-Gasteiz	Azaroak 19	17:30
Online	Abenduak 2	10:00
Vitoria-Gasteiz	Abenduak 10	17:30
Barakaldo	Abenduak 15	17:30
Bilbao	Abenduak 17	18:00
Online	Urtarrilak 12	18:00

Informazio gehiago hemen: GAZ, emantzipaziorako zerbitzua | Gazteaukera