Bi atxilotu Sestaon kamioi batetik kobrezko materiala lapurtzeagatik

Ertzaintzak bi gizon atxilotu zituen atzo ebasketa-delitua leporatuta. Atxilotuek kobrezko hodiak, 200 bat metro, lapurtu zituzten kamioi batetik. Lapurtutakoaren balioa 600 bat eurokoa da.

Atzo, asteazkena, arratsaldeko ordu bi eta erdiak aldera, Ertzaintzari jakitera eman zioten hainbat pertsonak materiala lapurtu zutela Sestaoko merkataritza-establezimendu batzuen ondoan aparkatuta zegoen kamioi batetik, eta Sestaoko herrigunerantz ihes egin zutela furgoneta batean.

Sestaoko Ertzain-etxeko herritarren babeseko patruila bat berehala joan zen adierazitako lekurantz, eta emandako deskribapenarekin bat zetorren furgoneta bat aurkitu zuen. Agenteek geldiarazi egin zuten, eta furgoneta bera eta furgonetan zihoazen bidaiariak miatu ondoren, kobrezko hainbat hodi, dirua, palankaxka bat eta mailu bat aurkitu zituzten.

Ertzaintzak jakin zuen bi susmagarriak, lapurreta egin eta berehala, txatartegi batera joan zirela materiala saltzera, eta patruila bat establezimendura joan zen, beraz, eta egiaztatu zuen ezaugarri berberak zituzten bi gizonek kobrezko material-zatiak saldu zituztela minutu batzuk lehenago eta 635 euro ordaindu zizkietela.

Agenteek furgonetan aurkitutako materiala eta txatartegian saldutakoa konfiskatu zituzten, kamioi-gidariak bereak zirela aitortu ondoren, eta bi gizonak atxilotu zituzten, beraz, ebasketa-delitu bana leporatuta.

Aurrekari ugari dituzten atxilotuak, espainiar nazionalitateko 20 eta 47 urteko gizonak, polizia-egoitzara eraman zituzten dagozkion eginbideak betetzera, eta gaur egunean zehar jarriko dituzte agintari judizialaren eskuetan.