- Hautaketa-prozesua datorren urtean egingo da, Estaldura Zaileko EPE berri batekin batera, behin-behinekotasuna murrizten aurrera egiten jarraitzeko
- Osakidetzak iragarri du urtarrilean irekiko duela langile finkoen mugikortasuna errazteko Lekualdatze Lehiaketan izena emateko epea
Osakidetzako Mahai Sektorialak gaurko bileran urrats berriak eman ditu datorren urtean EPE arrunt berri bat egiteko, behin-behinekotasuna % 8tik behera murriztea helburu duena. Gaur onartu da 2025eko birjarpen-tasa, 1.247 plazakoa eta, beraz, baieztatzen da EPE berri honetan deituko den lanpostu-kopurua, 2023., 2024. eta 2025. urteei dagokiena, 4.500 plaza ingurukoa izango dela, eta kopuru hori oraindik handitu egin liteke Osakidetzak datorren urterako onartzea aurreikusita duen plantilla handitzeko espedientearekin.
EPE berri honetan Mahai Sektorialean jada onartutako eredu berria aplikatuko da, batez ere hautaketa prozesuak arintzea eta parte hartzea erraztea helburu duena. Hala, eredu horrek berrikuntza nagusi gisa jasotzen du gai-zerrendarekin lotutako galdera-multzo bat ematea, batez ere aurreko azterketetatik ateratakoak, betiere baliogabetu ez badira, bai eta nota hiru urtez mantentzeko aukera ere.
EPE honekin batera, beste hautaketa-prozesu baterako deialdia ere egingo da, kasu honetan Lehen Mailako Arretan betetzeko zailak diren plazak betetzea helburu. Ezaugarri horiek dituen bigarren ekitaldia da, eta, gaur Mahai Sektorialean jakinarazi den bezala, berritasun nagusi gisa izango du plaza lortzen duten pertsonei gutxienez bi urtez bertan egotea eskatuko zaiela, lanpostu hori berriro hutsik geratuko ez dela bermatzeko eta, horrela, osasun-zentro horietako erabiltzaileei zerbitzu hobea emateko, batez ere landa-eremuetako kontsultategiak eta EAGak baitira, baina baita hiriguneetan kokatutako osasun-zentroetako arratsaldeko txandak ere.
Gaurko Mahai Sektorialean ere jakinarazi da 2026ko urtarrilean Lekualdatze Lehiaketan izena emateko epea irekitzeko asmoa dagoela, Osakidetzako langile finkoen barne-mugikortasuna errazteko, Euskal Osasun Zerbitzuak enplegu publikoarekin eta kalitatekoarekin hartutako konpromisoari erantzunez.
Bestalde, eta gai-zerrendatik kanpo, sindikatuek interesa agertu dute Osakidetzaren osasun mentaleko sarearen egungo eta etorkizuneko egoeraren inguruan. Zentzu horretan, Osakidetzak adierazi du sare hori ez dela “desegin”, zenbait agentek esan duten moduan, eta gaur egun, Euskadiko Osasun Itunaren 11. ildo estrategikoari erantzunez, bi lantalde daudela asistentzia-ibilbideari buruzko hausnarketa egiten, “pazientearentzat eta beren familientzat soluziorik onena bilatzeko, hori da gure helburu nagusia”. Talde horiek osasun mentaleko sareko profesionalek, eremu sozioanitarioko pertsonek, pazienteen elkarteek, Hezkuntza arloko pertsonek eta Estatu-mailan erreferente diren adituek osatzen dituzte. Hausnarketa amaitu ondoren aurkeztuko dira ondorioak.
Nolanahi ere, Osakidetzak gogorarazi die sindikatuei lan-baldintzak aldatzea dakarren edozein erabaki Osasun arloko Mahai Sektorialetik pasatu behar dela beti, eta, beraz, “faltsutzat” jo ditu baldintza horietan aldaketak egon daitezkeela dioten informazioak.