Bingen Zupiria: “Segurtasun Sailaren aurrekontuak gure zerbitzu publikoa eta gure segurtasun eredua indartuko ditu”

• Segurtasun Sailak 2026an 850 milioi euroko aurrekontua izango du, aurreko urtearekin alderatuta %6,4 gehiago.
• Inbertsio garrantzitsua egingo da informatika, telekomunikazio eta elkarreragingarritasun sistemak eguneratzeko, bai eta Ertzaintzaren eta meteorologiaren materialak berritzen jarraitzeko ere.

Segurtasun sailburu Bingen Zupiriak Eusko Legebiltzarrean aurkeztu ditu bere sailaren 2026ko aurrekontuak. Zupiria, Ricardo Ituarte Segurtasuneko sailburuordearekin eta Miriam Anitua Kudeaketa Ekonomikoko zuzendariarekin batera egon da. Guztira, Segurtasun Sailaren aurrekontua 850 milioi eurokoa da, 2025eko aurrekontuaren aldean %6,4ko igoerarekin. Sailburuak azpimarratu du datorren urteko aurrekontuak hiru ardatz nagusi dituela: segurtasun zerbitzu publikoaren modernizazioa, baliabide berriak eskuratzea eta Ertzaintza, Arkauteko Akademia, Euskalmet eta Cyberzaintza indartzea, “gure sistemaren oinarria diren erakundeak hain zuzen ere”. Zupiria sailburuaren esanetan, helburua da “gure zerbitzu publikoa eta segurtasun eredua sendotzea”.

Bere agerraldian, Zupiriak nabarmendu du aurrekontu berriarekin bi helburu nagusi, bata indibiduala eta bestea kolektiboa, lortu nahi direla: batetik, herritar guztien askatasuna eta lasaitasuna bermatzea, eta bestetik, komunitatea sendotzen laguntzea eta Euskadiren izen ona babestea.

Segurtasun eta Larrialdi Zerbitzu Publikoak

Segurtasun Sailak inbertsio handia egingo du informatika, telekomunikazio eta elkarreragingarritasun sistemak eguneratzeko. Zupiriak azaldu duenez, “euskal gizarteak aurre egin behar dien arriskuei eta mehatxuei behar bezala erantzuteko, funtsezkoa da administrazio guztietako segurtasun eta larrialdi zerbitzu publikoek behar bezala funtzionatzea”. Horregatik, “funtzionamendu eraginkorra bermatzeko beharrezko baliabide teknikoak eta bitartekoak eskuratzea ezinbestekoa da”.

Horien artean daude: gertakarien kudeaketa eta erantzun sistemak, jardueren garapenerako laguntza-tresnak, ikerketa polizialak, baliabideen koordinazio eta planifikazio eraginkorra, segurtasunaren arloko bideozaintza, informazio konfidentzialaren babesa eta komunikazioen legezko atzematearen estandarrak. Horretarako, lau jarduera-ildo nagusi izango ditu Sailak:

1. Segurtasun Saileko zentroak elkarrekin konektatzen dituen komunikazio-sistema (WAN MPLS) berrituko da, informazioa transmititzean banda-zabalera handiagoa lortzeko. Hiru urtean bi milioi euroko inbertsioa egingo da, baina 2026an 500.000 euroko aurrekontua izango du. Helburu nagusia zerbitzuen erantzun-denborak eta errendimendua hobetzea da, eta, horrez gain, hondamendi-egoeretan haien eskuragarritasuna ziurtatzea.

2. Guardasola proiektua: prozesuak eta operatiboak digitalizatzeko eta modernizatzeko tresna teknologiko eta zerbitzu berriak garatzea eta hornitzea, bai eta azterketan eta erabakiak hartzen lagunduko duen informazioa ateratzea eta partekatzea ere. Adimen artifizialeko soluzioak eta bestelako tresnak ere aplikatuko dira, baliabideen kudeaketa eta plangintza errazteko. Horrek guztiak egiten diren lanak sinplifikatzeko balioko du eta horrek eragin handia izango du polizia-prozeduren hobekuntzan. Zeregin horretara 2 milioi euro bideratuko dira hiru urtean, 2026ko 700.000 euroetatik hasita.

3. Telefonia-sarea berritu eta koordinazio operatiboko zentroetako baliabideak kudeatzeko sistemekin integratuko da, hala nola Larrialdiak Koordinatzeko Zentroarekin eta Poliziaren aginte- eta kontrol-zentroekin, larrialdi-egoera mota guztietan laguntzeko une kritikoetan erabakiak hartzeko eraginkortasuna eta efizientzia optimizatzeko. Berrikuntza horretarako 546.000 euroko aurrekontua erabiliko da.

4. ENBOR SARE BERRIA: azken belaunaldiko segurtasun-komunikazioen sistema berri bat ezartzea eta hedatzea, mugikortasuneko banda zabalaren gainean multimedia-komunikazio eraginkorrekin (irudia eta soinua) jarduteko aukera emango duena. Helburua da integrazio eta elkarreragingarritasun handiagoa lortzea Euskadiko segurtasun publikoaren sistemako erakundeen zerbitzura. ENBOR SARE BERRIAk 17 milioi euroko inbertsioa izango du 5 urtean, 2026an milioi 1 eurokoa izango dena.

Ertzaintza

Eusko Legebiltzarrean egindako agerraldian, Bingen Zupiria Segurtasun sailburuak gogorarazi du 2025ean Segurtasun Sailak akordioa lortu duela sindikatuekin Ertzaintzako kideen lan-baldintzak arautzeko, eta 2026a urte garrantzitsua izango dela hitzarmenaren baldintzak eta aukerak lantzeko. Gainera, sindikatuekin adostu dugu Enplegu Plana, eta Gobernu Batzordera eramango dugu urtea amaitu baino lehen. Helburua da bost urteren buruan Ertzaintzak 8.000 kide izatea. Poliziaren Euskal Akademia prestatzen ari da helburu hori lortzeko eta Ertzaintzako kideentzat egokitutako prestakuntzarekin jarraitzeko «.

2026an, Segurtasun Sailak Ertzaintzaren baliabideak berritzen jarraituko du, agenteei material hobeak eta modernoagoak emateko. Hala, Segurtasun Sailak, besteak beste, honako inbertsio hauek aurreikusi ditu:

• 2,7 milioi euro etilometroak eta argiketetarako eta seinaleztapenerako materiala erosteko Trafiko Unitaterako.
• 700.000 euro hainbat drone mota erosteko (kanpokoa, barrukoa, urpekoa…)
• 13 milioi euro, Ertzaintzaren ibilgailu-flota pixkanaka berritzen jarraitzeko.
• 2,8 milioi euro hainbat eraikin eta ertzain-etxe berritzeko, energia-eraginkortasuna maximizatzeko.

Polizia eta Larrialdietako Euskal Akademia

Bingen Zupiria sailburuak gogora ekarri du Polizia eta Larrialdietako Euskal Akademiak duen garrantzia, «gure profesionalei beren ibilbide osoan zehar laguntzeko» prestakuntza-zentro gisa, eta » segurtasun, polizia eta larrialdien euskal sistemari kalitatezko prestakuntza eskaintzeko» duen zereginagatik.
Iaz Arkauteko Akademiaren aurrekontua % 18 igo ondoren, 2026an 4,5 milioi euro gehiago izango ditu, 23,5 milioi eurotik 28,04 milioira pasatuz. Polizia eta Larrialdietako Euskal Akademiak honako erronka nagusi hauek izango ditu:

• Ertzaintzako 8.000 kideko erronkari erantzuteko ikasle kopuru gero eta handiagoari aurre egitea.
• Prestakuntza jarraituaren beharrei erantzuteko edukien plataforma modernizatzea.
• Ikasleek berriro bertan lo egiteko instalazioak egokitu eta berrantolatzea.

Cyberzaintza

Zibersegurtasunaren Euskal Agentziak 6,4 milioi euroko aurrekontua izango du guztira 2026an, hau da, aurten baino % 25,8 gehiago, alde batetik, ziber mehatxuak detektatzeko adimen prebentiboa indartzeko eta euskal sektore publikoan edo Euskadiko azpiegitura sentikorretan eragina izan dezaketen gertakariei erantzuteko gaitasuna indartzeko. Eta bestetik, IKT azpiegitura berritzea eta ekipamendu modernoko eta gaitasun handiko euskarria izatea, Cyberzaintzak ahalik eta erantzun onena emateko.

Larrialdiak eta Meteorologia

Segurtasun Saila segurtasun integralaren ikuspegitik ari da lanean, eta, horregatik, inbertsioak egiten jarraituko du fenomeno meteorologiko kaltegarriekin lotutako edozein larrialdi-egoera prebenitzeko. Imanol Pradales lehendakariak 5 milioi euroko inbertsioa iragarri zuen 2024ko abenduan Segurtasun Sailaren meteorologia-arloan, eta horietatik bi milioi euro 2026ko aurrekontuan jasota daude. Inbertsio horrek denbora errealeko neurketa-sistemak eguneratzen eta berritzen hasteko balioko du, horrela, «meteorologia kaltegarritik eratorritako erronkei eta klima-aldaketak eragindako ondorioei eraginkortasun handiagoz erantzun ahal izateko», azaldu du Zupiriak. Beste inbertsio batzuen artean, Kapilduiko radarra ordezkatzea edo material hidrometeorologikoa eta ozeanometeorologikoa erostea aurreikusten da, prebentzioa hobetzeko datuak lortzea hobetzeko.

Berdintasuna

Barne Ministerioaren VIOGEN2 sistemarekin konektatu ondoren, Segurtasun Sailak Emakumea Babesteko Sistema (EBA-Emakumeen eta Etxekoen Babes Sistema) eguneratzen jarraituko du, indarkeria eta eraso matxistak jasaten dituzten emakumeei babes egokia ematen jarraitzeko.

Guztira, Sailaren aurrekontuaren genero-ikuspegia 34,6 milioi eurokoa izango da. Bertan sartzen dira genero-indarkeriaren biktima diren emakumeak babesteko partida; bikotekideak edo bikotekide ohiak indarkeriaren biktima guztiei eskaintzen dien BORTXA izeneko aplikazioa; aipatutako EBA proiektua eta indarkeria matxistaren arriskuaren balorazioa neurtzeko tresna; edo genero-indarkerian arreta espezializatua ematen duten ertzainak, besteak beste.

Gainera, Ertzaintza emakumeen aurkako indarkeriari eta berdintasunari buruzko talde berri bat sortzeko prozesua amaitzen ari da emakumeen aurkako indarkeria eta berdintasuna ardatz izango dituena, indarkeriaren biktima diren emakumeak babesteko sisteman beste urrats bat emateko. «Emakumeen aurkako indarkeriaren biktimentzako arreta lehentasunezkoa, eraginkorra eta kalitatezkoa izan dadin nahi dugu, berriz biktimizazioa saihestuz eta arreta integrala, pertsonalizatua eta koordinatua bermatuz”.» adierazi du Bingen Zupiria Segurtasuneko sailburuak.