Irunen hainbat pintada antifeministaren egilea atxilotu dute

Ertzaintzaren agenteek 38 urteko gizon bat atxilotu dute kalte-delitua eta gorrotoa bultzatzearen delitua leporatuta, Irungo udalerriko hainbat lekutan mezu matxistak eta feminismoaren aurkakoak zituzten pintadak egiteagatik. Udaltzaingoak inplikatua identifikatu ondoren atxilotu dute, eta Ertzaintza arduratu da ikerketaz eta polizia-eginbideez.

Aste honen hasieran, Ertzaintzak jakin zuen emakumeen eta feminismoa babesten duten gizonen aurkako eduki iraingarriak eta laidogarriak zituzten hainbat pintada agertu zirela batez ere Irungo udalerriko erdialdeko etxebizitza-eraikinetako, lokaletako eta kirol-instalazioetako horma eta fatxadetan.

Oraingoz, lau sakaketa jarri dituzte antza denez joan den astelehenetik asteartera bitarteko gauean egin zituzten grafiti horiek eraikinetan eragindako kalteengatik.  

Irungo Udaltzaingoaren patruila batek pertsona bat identifikatu zuen goizalde horretan bertan Fermín Calbetón kaleko horma batean antzeko pintadak egiten ari zenean, eta kolore ezberdinetako esprai erako lau pintura-pote eta errotulagailu bat aurkitu zizkioten poltsa batean.

Gainera, zegokion salaketa administratiboa jarri zioten, bide publikoan ondasunak hondatzeagatik. Hortik aurrera, Ertzaintzak bere gain hartu zituen egitate horiei buruzko ikerketak, generoagatiko ustezko gorroto-delitua izan zitekeelako. Egindako ikerketen eta pintaden edukiaren azterketan oinarrituta, atzo, asteazkena, goizean atxilotu zuten aipatutako gizona kalte-delitua eta gorrotoa bultzatzearen delitua leporatuta.   

Egiaztatu ahal izan denez, pintadak, horietako batzuk handiak, herriko hamar bat kale eta parketan daude, fatxadetan, markesinetan, hiri-altzarietan eta abarretan.

Atxilotua espainiar nazionalitateko 38 urteko gizona da, eta Agintaritza Judizialaren eskuetan jarri dute beharrezko polizia-eginbideak amaitutakoan.