Gobernantza, Administrazio Digital eta Autogobernu Sailak 167,5 milioi bideratuko ditu 2026an administrazio arinagoa eta pertsonengan zentratuagoa sendotzera

• Eraldaketa Digitaleko Plana eta Sektore Publikoko Adimen Artifizialeko Estrategia hedatuko dira, Administrazio eraginkorragoa, arduratsuagoa eta gizatiarragoa eraikitzeko
• GADAko sailburu Maria Ubarretxenak aurreratu du lan-eskaintza publiko berriak jarriko dituela martxan, gaitasunetan oinarritutako eta belaunaldi-errelebora bideratutako hautaketa-eredu batekin
• Politika publikoen eragina ebaluatzeko eta neurtzeko esparru bat ezarriko da, kontuak emateari lotua eta Gobernu Irekiaren III. Planarekin lerrokatuta

Gobernantza, Administrazio Digital eta Autogobernu Sailak 167,5 milioi euroko aurrekontua izango du 2026an, administrazio arinagoa, efizienteagoa eta gardenagoa sendotzeko, beti herritarren zerbitzura.

Maria Ubarretxena sailburuak, saileko sailburuordeekin batera, arlo bakoitzera bideratutako partidak zehaztu ditu. Administrazio Digitalaren eta Zerbitzu Orokorren Sailburuordetzak biltzen du aurrekontu handiena, ia 120 milioi eurorekin; ondoren, Enplegu Publikoaren Sailburuordetza, 29,5 milioirekin; Araubide Juridikoaren Sailburuordetza, 6,3 milioirekin; eta Erakunde Harremanetarako Sailburuordetza, 5,2 milioirekin.

Ubarretxenak azpimarratu duenez, aurrekontu hauek hiru jarduera-ardatz nagusiren inguruan egituratzen dira: «Autogobernuan aurrera egiten jarraitu nahi dugu, gure eskumenak defendatuz, betez eta zabalduz, herritarren ongizatea hobetzeko helburuarekin. Administrazioaren aro berri batean ere sartuko gara, modernoagoa eta efizienteagoa, pertsonen bizitza erraztuko duena eta irekiagoa, gardenagoa eta parte-hartzaileagoa izateko bokazio argiarekin, kalitate demokratikoa indartuz «.

Sailburuak aurreratu duenez, 2026an politika publikoen eragina ebaluatzeko esparru bat jarriko da abian, Sektore Publikoko Adimen Artifizialeko Estrategia hedatuko da eta enplegu-eskaintza publiko berriei ekingo zaie gaitasunetan oinarritutako hautaketa-eredu batekin.

Administrazio Publikoaren eraldaketa digitala sendotzea

Administrazio Digitalaren eta Zerbitzu Orokorren Sailburuordetzak 120 milioi euroko aurrekontua kudeatuko du, euskal administrazioaren eraldaketa digitala eta modernizazio integrala sendotzeko, teknologia pertsonen zerbitzura jarriz.

Inbertsioa bi eremu handitan oinarrituko da: herritarrentzako zerbitzu digitalak hobetzea eta sektore publikoaren barne-prozesuak optimizatzea. Esparru horretan, 73,6 milioi euro dagozkio EAEko Administrazio Publikoaren Estrategia Digitalari; Sektore Publikoaren Adimen Artifizialeko Estrategiak, berriz, AA sendotuko du gizarte-balioko, eraginkorreko, arduratsuko eta giza balioko tresna gisa.

Sailburuordetzaren partida nagusien artean, honako hauek nabarmentzen dira:

• 12 milioi euro Azpiegitura Teknologikoen Zerbitzua indartzeko, sistemen segurtasuna eta jarraitutasuna bermatuz.
• 9 milioi euro PLATEA hobetzeko, e-Administrazioaren plataforma teknologikoa.
• Milioi 1 euro, DENA atarirako. Atari horrek aukera emango du puntu bakar batetik hainbat administrazioren zerbitzu eta datu publikoak eskuratzeko.

Bestalde, EJIE sozietate publikoak zerbitzu teknologiko korporatiboak babesten jarraituko du, eta 14,8 milioi euro gehiago jarriko ditu bere aurrekontuan (aurreko ekitaldian baino % 6,4 gehiago). 2026an, adimen artifizialean espezializatutako unitate bat sortuko du, EAEko sektore publiko osoan teknologia horien ezarpena bizkortzeko.

ITELAZPIk, saileko sozietate publikoak, 1,5 milioi euro inbertituko ditu bereizmen handiko lurreko telebista (TDT UHD) eskaini ahal izateko telekomunikazio-sare berri baten garapenean, 18 milioi euroko urte anitzeko proiektu baten barruan.

Irrati digitaleko emanaldiak garatzen ere hasiko da, audioaren kalitatea hobetuz eta larrialdi-egoeretan informazio pertsonalizatua bidaltzeko aukera emanez. Era berean, Eusko Jaurlaritzaren komunikazio-gaitasuna indartuko da ustekabeko edo eragin handiko ekitaldien aurrean, TETRA sarea hobetuz, 887.000 euroko inbertsioarekin.

Enplegu publikoaren kudeaketa modernizatzea

Funtzio Publikoko Sailburuordetzak 29,5 milioi euro izango ditu 2026an, funtsezkoa baita Administrazio Orokorraren barne-funtzionamendurako. Horietatik 4,2 milioi aplikazio informatikoetara bideratuko dira langileen prozedurak digitalizatzeko, eta 630.660 euro EIZU sistema eta lehiaketa- eta hautaketa-prozesuak garatzeko.

Datorren urtean, lan-baldintzen akordio berriaren negoziazioa amaituko da, eta laneko jazarpena prebenitzeko eta hari aurre egiteko protokolo integral berri bat onartuko da, arrisku psikosozialen kudeaketan oinarritua. Gainera, 200.000 euro bideratuko dira sailaren Emakumeen eta Gizonen Berdintasunerako Planera.

IVAP erakunde autonomoak 19,2 milioi euroko aurrekontua izango du langile publikoen garapen profesionala sustatzeko, hiru ildo estrategikoren bidez:

• Zeharkako konpetentzietan eta kudeaketa-konpetentzietan prestakuntza-ibilbideak ezartzea.
• Ezagutza trukatzeko sistema bat sortzea, jarraitutasun profesionala eta belaunaldi-erreleboa bermatzeko.
• Euskararako arau-itzulpena sustatzea, eremu instituzionalean erabilera normalizatua indartuz.

Kalitate demokratikoa eta gardentasuna indartzea

Erakunde Harremanetarako Sailburuordetzak 5,2 milioi euro izango ditu erakundeen arteko lankidetza eta herritarren parte-hartzea indartzeko.

2026an, politika publikoen eragina ebaluatzeko eta neurtzeko esparru bat jarriko da abian, kontu-ematearekin hertsiki lotuta eta duela gutxi onartutako hirugarren OGP planarekin lerrokatuta.

Era berean, gardentasun-atariak – Euskadi.eus, Gardena eta Irekia – birdiseinatzeari ekingo zaio, haien erabilgarritasuna, koherentzia eta irisgarritasuna hobetzeko, eta herritarrei informazio publikorako sarbidea errazteko.

Euskal Herriko Agintaritzaren Aldizkariaren (EHAA) modernizazioari buruzko azterlan bat ere egingo da, aplikazio informatikoak eguneratzeko, edukien argitalpena arintzeko eta epe luzera funtzionamendua bermatzeko.

Autogobernua defendatzea, zabaltzea eta hobetzea

Araubide Juridikoaren Sailburuordetzak 6,3 milioi euroko aurrekontu orokorra izango du, euskal sektore publiko osoaren defentsa eta segurtasun juridikoa bermatzeko.

Ubarretxena sailburuak nabarmendu duenez, «aurrekontu honetako 4,3 milioi eurok euskal sektore publiko osoaren interesen babesa bermatzen dute. Leialtasunez, zorroztasunez eta profesionaltasunez egindako lana da, eremu instituzionalean oso aintzatetsita dago, eta funtsezkoa da euskal sektore publikoaren segurtasun juridikoa bermatzeko».