Lau atxilotu Ordizian, gizon batek irailaren 21ean herri horretan jasandako eraso bortitzarekin lotuta

Ertzaintzak 18 eta 43 urte bitarteko lau gizon atxilotu ditu Ordizian, hilabete baino gehiagoko ikerketen ondorioz, espainiar nazionalitateko gizon bati lesio larriak eragitea egotzita. Gizon horrek zauri larriak izan zituen eta Donostia Ospitalean dago oraindik. Gainera, inplikatuek biktimaren bi lagunak mehatxatu zituzten gertatutakoa Ertzaintzari ez kontatzeko. Lau atxilotuak epailearen esku utzi dituzte, eta erasotzaile nagusia espetxeratzeko eta gazteena adingabeen zentro batean sartzeko agindu dute.

Ertzaintzak ikertutako gertakariak irailaren 21eko arratsaldean gertatu ziren Ordiziako aparkaleku publiko batean. Hiru gizon ibilgailua hartzera zihoazen, eta, aurretik, haietako bat bide publikoan pixa egiten hasi zen aparkalekuaren bazter batean. Inguruan paseatzen ari zen bikote gazte batek bere ekintza aurpegiratu zien. Antza denez, hori izan zen eraso bortitzaren eragilea.

Lehenik eta behin, bi gazteek pertsona gehiagori eman zieten abisua, eta, hasiera batean, gizon bat hurbildu zen, egurrezko makila bat eskuetan zuela. Gizon horrek, hitzik esan gabe, makilaz eta ukabilaz eraso egin zion hiru gizonetako bati, eta horrek ihes egitea eta inguruko saltoki batean ezkutatzea lortu zuen. Une horretan, beste hiru gizon iritsi ziren, eta beste gizon bati eraso egiten hasi ziren. Gizon hori lurrera bota zuten, eta, ondoren, ukabilkadaz edo ostikoz kolpatzen jarraitu zuten, minutu batez, gutxi gorabehera. Hirugarren gizonak auto barruan ezkutatuta saihestu zuen erasoa.

Ertzaintzako patruilak biktima larri zaurituta zegoen lekura joan ziren, eta anbulantzian eraman behar izan zuten Donostia Ospitalera, eta han dago ordutik.

Gertakariaren unean, erasotzaileek mehatxatu zituztelako haien errepresalien beldur, erasotuaren bi lagunetako inork ez zion gertatutakoa Ertzaintzari esan, baina Oriako ertzain-etxeak ikerketa bat jarri zuen abian, halako lesio larrien jatorria eta arrazoia argitu ahal izateko.

Polizia-ikerketa sakona Tolosako dagokion epaitegiak agindutako jarduketen sekretupean egin da. Izapidetutako eginbideetan oinarrituta eta egindako ikerketen ondorioz, agenteek lau erasotzaileak identifikatzea lortu zuten. Hori dela eta, urriaren 27an, Oriako ertzain-etxeko baliabide askok operatibo bat egin zuten Ordizian, eta lau egileak atxilotu zituzten aldi berean, herriko hiru lekutan: 43, 20 eta 18 urteko nazionalitate espainiarreko hiru egile eta 33 urteko jatorri europarreko beste bat, lesio larrien eta mehatxuen ustezko delituak egotzita. Gazteena adingabea zen gertakarien unean.

Urriaren 28an, asteartea, atxilotuak Tolosako epaitegiaren esku utzi zituzten, eta, han, 43 urteko erasotzaile nagusia espetxeratzea agindu zuten (hainbat delitu-aurrekari zituen). Bestalde, Adingabeen Fiskaltzak 18 urteko gaztea Zumarragako Barneratze Zentrora eramatea agindu zuen.