Ertzaintzak 31 urteko gizon bat atxilotu du gaur, asteartea, goizaldean Gasteizen, telefoniako merkataritza-establezimendu batean indarra erabiliz lapurtzea egotzita.
Gaur goizaldeko hirurak baino lehentxeago, Ertzaintzari jakinarazi diote bi gizon Salburua auzoko telefonia-denda bateko erakusleihoko kristala puskatzen saiatzen ari zirela. Horretarako, patinete elektriko bat erabili dute, eta patinetearekin kolpeka ari ziren. Herritarren babeserako dotazio bat berehala hurbildu da adierazitako gunera, inguruan zaintza-lanak egiten ari zena, eta egiaztatu du adierazitako establezimenduaren fatxadako beiratea hautsita zegoela eta odol-arrastoak zituela.
Jakin ahal izan denez, ustezko lapurrak handik ihesi atera dira une bat lehenago, eta patruilak ingurua miatzeari ekin dio. Handik gutxira, lapurretaren egileetako baten ezaugarriei erantzuten zien gizon bat ikusi dute etxe baten atarian. Agenteek geldiarazi egin dute, eta ikusi dute eskuan ebaki odoltsu bat zuela eta ihesean odol errekasto bat utzi duela. Beharrezko egiaztapenak egin ondoren, 31 urteko magrebtarra atxilotu dute, indarra erabiliz lapurtzea egotzita.
Ondoren, ertzain-etxera eraman dute, beharrezko izapideak egiteko, eta ikerketa zabalik dago lapurretan parte hartu zuenaren nortasuna egiaztatzeko.