Ertzaintzak unibertsitateko ikasleen prestakuntzan laguntzen jarraitzen du

2025ean, 58 gaztek egin zituzten praktika akademikoak Ertzaintzaren unitateetan, eta aurtengo ikasturtean, oraingoz, 43 pertsonak egingo dute prestakuntza erakundean.

Azken urteetan ohikoa den bezala, eta kanpoko praktika akademikoak egiteko Ertzaintzak eta hainbat unibertsitatek sinatutako lankidetza-hitzarmenei esker, Euskadiko eta Estatuko gainerako lurraldeetako unibertsitateetako 43 ikaslek datozen asteetan hasiko dute prestakuntzako praktikaldia Ertzaintzaren unitateetan.

Talde hori 29 emakumek eta 14 ikaslek osatzen dute, gehienak Kriminologiako edo Zuzenbideko ikasleak dira, eta Ertzaintza osatzen duten ataletako eguneroko lanarekin lotutako zereginak beteko dituzte. Horrela, ikasleek benetako ingurune profesionalean aplikatu ahal izango dute unibertsitateko prestakuntzan ikasitakoa.

Ertzaintzak horrelako praktikak egiteko 2025ean jasotako eskaeren kopuruak % 40 egin du gora iazko urtearekin alderatuta, eta onartutako eskaerak % 70 gehiago dira. Horrela, guztira, iazko ikasturtean 58 ikaslek (46 emakumek eta 12 gizonek) egin zituzten praktikak erakundean: 50 Euskadikoak ziren, 7 Madrilgoak eta 1 Kataluniakoa.

Ekimen honen bidez, Ertzaintzak profesionalen belaunaldi berrien prestakuntzarekin hartuta duen konpromisoa indartzen du, ikasleei benetako lan-ingurune batean kalitatezko esperientzia praktikoa izateko aukera emanez. Unibertsitateekin lankidetzan jardutean, alde batetik, ikasleen garapen akademiko eta profesionalean laguntzen da, eta, bestetik, ezagutzan, erantzukizunean eta zerbitzu publikoan oinarritutako prestakuntza sustatzen da, oinarrizko balioak baitira segurtasun publikoarekin lotutako etorkizuneko jarduera profesionaletan aritzeko.