Nerea Melgosa: «Euskadin, pantailei eta ongizate emozionalari buruzko eztabaidak denbora luzea darama irekita, eta herri-estrategia integral batetik heltzen zaio»

Nerea Melgosa sailburuak Pedro Sanchezen gobernuak 16 urtetik beherakoei sare sozialen erabilera debekatzeko iragarritako neurriari buruzko hasierako balorazio bat egin du. «Sanchezen iragarpena ez da eztabaidaren muina. Lehendakariak irailean mahai gainean jarri zuen bezala gakoa ongizate emozionala da, gizarte aurreratuen ezinegona eta herri estrategia integrala. Pantailen erabilerari eta ongizate emozionalari buruzko eztabaida ez da iragarki puntual batekin hasten. Euskadin aspalditik jorratzen ari garen gizarte aurreratuen erronka sakona da» azaldu du Ongizate, Gazteria eta Erronka Demografiko sailburuak.

Melgosak gogoratu du Lehendakariak Politika Orokorreko Eztabaidaren erdigunean kokatu zuela gaia, osasun mentalarekin, hezkuntzarekin, komunitatearekin eta kontratu sozial berriarekin lotuz. «Eusko Jaurlaritzak herri-estrategia integral bat lantzen du ongizate emozionala zaintzeko, batez ere haur eta nerabeena, erantzun sinple edo isolatuetatik haratago. Euskadin, pantailei eta ongizate emozionalari buruzko eztabaidak denbora luzea darama irekita, eta herrialdearen estrategia integral batetik heltzen zaio, ez neurri puntualetatik. Ondo bizi eta ondo sentitu nahi badugu, arlo emozionalarekin, arlo komunitarioarekin eta teknologiarekin nola erlazionatzen garen zaindu behar dugu. Hori da Euskadik mahai gainean jarri duen eztabaida» gaineratu du Eusko Jaurlaritzaren ordezkariak.