26_0111 Euskadiko Larrialdi Zerbitzuak gizon baten bila ari dira Bidasoa ibaian, Irunen, indarrez egindako lapurreta batean nahasita egon ostean uretara salto egin duena

Bilaketa gaur goizaldean aktibatu da Bidasoa ibaian, eta Aginte Postu Aurreratu batek miaketa lanak koordinatzen ditu, hainbat agenterekin batera.

Gertakariak goizaldeko 01:34etan hasi dira, Irunen. Pertsona batek Ertzaintzari jakinarazi dio bi gizon diru-kutxak indarrez irekitzen ari zirela ibilgailuak garbitzeko gunean, gasolindegi baten ondoan.

Ertzaintzako patruilak abisuaren lekura joan dira, eta ustezko bi egileak korrika ateratzen ikusi dituzte. Horietako batek Bidasoa ibaira salto egin du, Behobiako zubiaren eta Faisaien uhartearen artean, eta, dirudienez, uretan desagertu da.

Une horretatik aurrera, larrialdietako baliabideak aktibatu dira, suhiltzaileei eta Gurutze Gorriari abisua emanez. Horiek, Irungo Herritarren Babeserako patruilekin batera, pertsona desagertu den gunean bilatzen hasi dira, azken euriteek ibaian eragindako korrontearen indarra eta ikuspenik eza kontuan hartuta. Hasiera batean, Itsas Salbamenduak Helimer helikopteroa bidali du, airetik miaketa egiteko.

Ertzaintzak Frantziako agintariei ere eman die abisua, Polizia eta Aduana Lankidetzarako Hendaiako Zentroaren bidez.

Eusko Jaurlaritzako Larrialdiei Aurre Egiteko teknikari batek Ertzaintzaren Zaintza eta Erreskate Unitateko ur-ataleko baliabideak ere mobilizatu ditu, bilaketa lanetan aritzeko. Euskadiko Laguntza Txakurren Taldea ere batu da bilaketa lanetara.

Beste inplikatua, 31 urtekoa eta nazionalitate espainiarrekoa, atxilotu egin dute, indarra erabiliz lapurreta egiten saiatzea egotzita. Prebentziozko miaketan 100 gramo haxixeko tableta bat aurkitu diote agenteek, eta horregatik ere ikertu dute osasun publikoaren aurkako ustezko delitu batengatik.