Ertzaintzak berriz omendu du gaur eguerdian Iñaki Totorika Vega, ETAk orain dela 25 hil zuen ertzaina. Oroimen-ekitaldia Hernaniko Ertzain-etxean, bere oroimenez jarritako monolitoaren ondoan, egin da.
Victoria Landa Ertzaintzaren zuzendariak, Josu Bujanda Ertzaintzaren buruak, Herritarren Babeserako Ataleko eta Ikerketa Kriminaleko buruek, Gipuzkoako Lurralde Burutzak eta Hernaniko Ertzain-etxekoak, beste agente eta lankide batzuekin batera, omenaldi hunkigarria egin diote gaur, astelehena, atentatuaren egunetik 25 urte igaro direnean. Ertzainaren omenezko ekitaldia gaur eguerdian egin da Hernaniko Ertzain-etxean, bere oroimenez jarritako monolitoaren eta plakaren ondoan, eta lore-eskaintza eta minutu bateko isilunea egin dituzte.
Iñaki Totorika Vega Ertzaintzako agentea 2001eko martxoaren 9an, 25 urte zituenean, hil zuen ETAk, Ertzaintzaren aurka eraso egiteko prestatutako tranpa batean. Terroristek lehergailuak zeramatzan auto bat gurutzatu zuten Hernaniko Zinkoenea biribilgunean, eta urrutitik leherrarazi zuten herritarren segurtasuneko agenteak hurbildu zirenean.
Oroimen-ekitaldia Ertzaintzaren unitate eta polizia-zentro guztietan ere egin dute gaur eguerdian, eta minutu bateko isilunea egin dute hildako ertzainaren oroimenez.
15 agente hil zituen ETAk
Ertzaintzako 15 agente hil zituen ETAk 1985etik 2001era bitartean:
- Carlos Díaz Arcocha (1985).
- Genaro García de Andoain Larrinaga (1986).
- Juan José Pacheco Cano (1988).
- Luis Hortelano García (1989).
- Alfonso Mentxaka Lejona (1991).
- Joseba Goikoetxea Asla (1993).
- José Luis González Villanueva (1995).
- Iñaki Mendiluze Etxeberria (1995).
- Ramón Doral Trabadelo (1996).
- José María Aguirre Larraona (1997).
- Jorge Díez Elorza (2000).
- Mikel Uribe Aurkia (2001).
- Iñaki Totorika Vega (2001).
- Javier Mijangos Martínez de Bujo (2001).
- Ana Isabel Arostegui Legarreta (2001).