Irekiera berri horrekin, EAEko hiru hiriburuek GAZ bulegoa izango dute
Eusko Jaurlaritzak eta Donostiako Udalak lankidetza-hitzarmena sinatu dute Donostiako hiriburuan GAZ (Gazte Ibilbideak Abiarazteko Zerbitzua) bulego bat irekitzea bultzatzeko. Bulego hori erreferentziazko zerbitzu publikoa da gazteei emantzipazio-prozesuetan laguntzeko.
Bulego berria Kontadores Gazte Zentroan (Pasai San Pedro pasealekua, 13) kokatuko da, eta aurrez aurreko arreta, pertsonalizatua, doakoa eta sarbide unibertsalekoa eskainiko du, GAZen online zerbitzua osatuz eta Gazteen Emantzipaziorako Euskal Sarea indartuz.
Donostian bizi diren, ikasten ari diren, lan egiten duten edo bizi-proiektua garatu nahi duten 16 eta 34 urte bitarteko gazteei zuzenduta dago zerbitzua. GAZ bulegoak informazioa, orientazioa, bitartekaritza, aholkularitza eta laguntza emango ditu funtsezko eremuetan, hala nola enpleguan, prestakuntzan, etxebizitzan, mugikortasunean, ekintzailetzan eta gizarte-baliabideetan, etengabeko arreta emanez eta askotariko errealitateetara egokituta.
«Emantzipazioa gure gazteen erronka handietako bat da. Zerbitzu hori beren bizitzako une garrantzitsu batean laguntzeko sortu zen, Donostian beren bizi-proiektua eraikitzeko benetako tresnak eskainiz. Gazteak hemen geratu, hazi eta garatu ahal izatea nahi dugu, eta proiektu hau urrats erabakigarria da norabide horretan», adierazi du Iñigo Garcíak.