Eusko Jaurlaritzak, Finantzen Euskal Institutuaren (FEI) eta INDARTUZ Kapitala SA sozietate publikoaren bitartez, Euskadin produkzio-eraldaketa bultzatzeko zor-funtsa sortu eta administratuko duen sozietate kudeatzailea hautatzeko deialdia egin du. Zor-funtsa hori Finantzen Euskal Institutuak, Euskadi Eraldatuz 2030 planaren barruan, abiarazitako finantza-tresna berria da, kasu honetan Euskal Autonomia Erkidegoko industria-sarearen lehiakortasuna indartzera bideratua, proiektu estrategikoetarako finantzaketa malguaren bidez.
Funts berri horrek 100 milioi euroko ondarea izatea aurreikusi da, eta mugarria izango da Euskadiko lankidetza publiko-pribatuan. Finantzen Euskal Institutuak inbertitzaile gisa jardungo du, INDARTUZ sozietatearen bidez, eta funts horren ondarearen % 25 eta % 49 arteko ekarpena egitea aurreikusten du, betiere mobilizatutako kapitalaren gehiengoa pribatua dela bermatuta. Horrela, Eusko Jaurlaritzak inbertsio publikoaren efektu biderkatzailea maximizatu nahi du eta nazioko eta nazioarteko finantza-sektorearen kapital gehigarria erakarri.
Inbertsio estrategikoak eta inpaktukoak sustatzeko eratu berri den INDARTUZ sozietateak, deialdi honekin, hasiera ematen dio inbertsioa egiturako duen, inbertsio gehigarria erakarriko duen eta zor pribatuko bitartekoa kudeatuko duen kudeatzaile espezializatua hautatzeko prozesu formalari.
Funtsak finantzaketa malgua eskainiko du zenbait produkturen bidez, hala nola hazkundera eta ekoizpen-eraldaketara bideratutako mailegu arrunt, parte-hartzaile edo bihurgarrien bidez. Ohiko banku-eskaintza osatzeko diseinatuta dago tresna hori, eta proiektu bereziak finantzatzeko baldintza berezietara egokitzeko gaitasuna izango du. Hartara, Euskadirentzat bideragarriak eta balio estrategiko handikoak diren proiektuetarako beharrezkoak diren finantza-baliabideen eskuragarritasuna erraztuko du.
Errotzea eta tokiko konpromisoa sustatzea
Funtsaren ezaugarri garrantzitsuenetako bat Euskadiko Gutxieneko Inbertsiorako Konpromisoa da: ondare osoaren % 75, gutxienez, Euskal Autonomia Erkidegoarekin lotura estrategikoa duten enpresetan inbertitu beharko da. Lotura hori frogatu ahal izango da errotze nagusiaren bidez, tokiko jarduera ekonomikoaren gaineko zuzeneko eraginaren bidez edo eskualdean jarduera garrantzitsua duten filial estrategikoen bidez. Helburua da Euskal Autonomia Erkidegoko enpresa-sarearen lehiakortasuna hobetzeko, enplegu kualifikatua sortzeko eta eraldaketa teknologiko, energetiko eta sozialerako mobilizatutako baliabideen eragina maximizatzen saiatzea.
Deialdi horrekin, eta lankidetza publiko-pribatuan oinarrituta, Eusko Jaurlaritzak produkzio-eraldaketarako finantza-tresna alternatiboak jarri nahi ditu Euskal Autonomia Erkidegoko enpresa-sarearen esku. Kudeatzaileak bitartekari dituen finantzaketa hori erabiltzeak ezagutza sektorial handiagoa eskainiko du, arriskua dibertsifikatuko du, baliabide publikoak optimizatzea ahalbidetuko du eta enpresei ematen zaien laguntza biderkatuko du. Horrez gain, Euskal Autonomia Erkidegoko inbertsio-ekosistema sendotuko du eta kapitala eta talentua erakarriko du Euskadira.
Zor-funtsa administratzeaz arduratuko den kudeatzailea hautatzeko deialdia hau Euskal Finantza Aliantzaren gaineko konpromiso publikoa zehazten duen Euskadi Eraldatuz 2030 planaren esparruan abian jarritako ekimenetako bat da. Eusko Jaurlaritzak, 2025. urtearen hasieran lankidetza publiko-pribatuko esparru horren sorrera bultzatzeaz gain, bere gain hartu zuen Euskadiren eraldaketa ekonomikoa eta industriala finantzatzeko inbertsio publikoko 1.000 milioi euro jartzeko konpromisoa, eta arreta berezia jarri zuen industrian, berrikuntzan eta enpresak bertan errotzean, 3.000 milioi euro pribatu mobilizatzeko helburuarekin.
Euskadi Eraldatuz 2030 da konpromiso horren bide-orria. Urrian iragarri zen, eta dagoeneko zenbait mugarri bete dira:
- Finkatuz funtsaren inbertsio-irizpideak indartzea eta egokitzea, kapital-partaidetzen bidez enpresa bultzatzaileak bertan errotzeko inbertsio-bitartekoa baita —duela gutxi sinatutako Ayesaren eragiketa edo Talgorena, adibidez—.
- Indartuz sozietatea sortzea, inbertsio eraldatzaile handietan inbertitzeko bitarteko berria, lau inbertsio-arlo izango dituena: eskalagarritasun-programa (joan den hilean abiarazi zen lehen deialdia), zor malgua, azpiegitura aurreratuak eta trantsizio soziala.
- Finantzen Euskal Institutuaren zuzeneko Indartuz finantzaketa-lerroa abiaraztea, eraldaketa-proiektuetarako mailegu eta abalen bidez.
- Eskalagarritasunean inbertitzeko programaren lehenengo deialdia argitaratzea, Indartuz sozietatearen bitartez, helburuetako bati jarraituta: funtsen funts gisa jardutea.
2026an eta 2027an, inbertsio-planean zehaztutako gainerako ekimenak eta neurriak garatuko dira, hala nola abalatutako finantzaketa-lerroa, Indartuz sozietatearen gainerako inbertsio-programak edo Euskal Autonomia Erkidegoko industria berria eta garatzen ari diren sektoreak bultzatzeko Autonomia Erkidegoko Arrisku Kapitalak kudeatutako tresnak.
Produkzio Eraldaketarako Zor Funtsa funtsezko tresna da berrikuntza, hazkunde, trantsizio energetiko eta digitalizazioko proiektuak bultzatzeko —Euskadiren lehentasun estrategikoekin eta lehiakortasunerako Europako agendarekin bat datozen proiektuak hain zuzen—.Deialdiaren dokumentazio guztia eskuragarri dago Finantzen Euskal Institutuaren webgune ofizialean (www.ivf-fei.euskadi.eus)