26_0205 Irunen 20 ibilgailu nahita erre zituen gizona atxilotu dute

Ertzaintzak, azken hilabeteetan Irunen 20 ibilgailu nahita erre izanaren harira, mugapeko udaltzaingoekin elkarlanean egindako ikerketa baten ondorioz 25 urteko gizon bat atxilotu dute suteak eragitea leporatuta.

Orain atxilotu duten gizonari leporatzen dioten lehenengo delitua iazko irailaren 6an gertatu zen Irunen. Egun horretako goizaldean, Anaka auzoan hiru autok su hartu zuten, eta sutea nahita eragin zutela zehaztu ahal izan zuten.

Une horretatik aurrera, egun horretatik aurtengo urtarrilera bitartean, modus operandi bera jarraituz eta hiriko eremu berean nahita egindako antzeko beste hamabi sute izan ziren. Ekintza horien ondorioz, guztira 20 ibilgailu, horien artean autoak, furgonetak eta ziklomotorrak, izan ziren kaltetuak, eta horietako batzuk erabat kiskalita geratu ziren.

Kasu guztietan, egileak gauez jarduten zuen, eta auzo horretako leku ezberdinetan aparkatuta zeuden ibilgailuen gurpiletan elementu sukoiren bat jartzen zuen, eta patinete elektriko bat erabiltzen zuen mugitzeko. Ibilgailuen jabeen artean ez zegoen inolako konexiorik.   Hilabete hauetan egindako ikerketari eta Irungo Udaltzaingoarekin elkarlanean egindako zaintza-dispositiboei esker, espainiar nazionalitateko 25 urteko gazte bat atxilotu zuten, ibilgailu horiek nahita erretzea leporatuta.

Hori dela eta, beharrezko frogaketak egin ondoren, astelehen arratsaldean Ertzaintzako agenteek susmagarria atxilotu zuten. Gero bere etxebizitzan sartu eta miaketa egin zuten, eta beste hainbat ebidentziaren artean 350 bat metxero eta erregai-kargagailu bat konfiskatu zituzten, baita patinetea eta suteak eragiteko unean soinean zituen hainbat jantzi ere.

Gaur, asteazkena, goizean, polizia-egoitzan beharrezko eginbideak amaitu ondoren, atxilotua Agintaritza Judizialaren eskuetan jarri dute.