Euskalmeten arabera, negua bustia eta oso beroa izan da

• Prezipitazio ugariak eta normala dena baino tenperatura argi eta garbi altuagoak izan dira 2025-2026ko neguaren ezaugarri meteorologikoak.
• Guztira, 7 alerta laranja eta 121 abisu hori eman dira haizeagatik, prezipitazio iraunkorrengatik, elurragatik, izotzagatik eta itsaso zakarragatik.

Euskalmet Euskal Meteorologia Agentziaren arabera, 2025-2026ko negua (abendua-urtarrila-otsaila) bustia izan da itsasertzean eta batez besteko tenperaturak oso beroak izan dira lurralde osoan, eta nabarmentzekoa da depresio atlantikoen iraunkortasuna eta jarduera meteorologiko handia.

PREZIPITAZIOA

Prezipitazioak ugariak eta iraunkorrak izan dira neguaren zati handi batean, eta ohi baino prezipitazio gehiago metatu da eremu zabaletan, bereziki isurialde kantauriarrean. Erregistrorik handienak Gipuzkoa ipar-ekialdean pilatu dira, eta bertako bi estazio 700 mm-tik gora ibili dira (Eskas 766,5 mm eta Añarbe 707,3 mm). Bizkaia barnealdean eta mendialdeetan ere prezipitazioak ugariak izan dira (Mallabia 558,6 mm, Almike 542,1 mm eta Zegama 533,4 mm). Aldiz, kopuruak txikiagoak izan dira Araba hegoaldean eta Arabako Lautadako hainbat puntutan, ez baitira 200 milimetroetara iritsi (Zambrana 148,6 mm, Moreda 154,3 mm eta Espejo 172,4 mm).  Prezipitazio-egunen kopurua handia izan da, eta 40-45 euri-egun izan dira isurialde kantauriarrean eta 30-35 Arabako Lautadan eta Arabako Errioxan.

Elurra neguko hainbat egunetan egin du, baina, orokorrean, maila aldakorretan, eta presentzia handiagoa izan du urtarril hasierako egun hotzetan.

TENPERATURA

Tenperaturei dagokienez, negua argi eta garbi oso beroa izan da, eta batez besteko balioak 1991-2020 aldiko batezbestekoaren gainetik ibili dira. Kostaldean tenperatura 10-12 ºC inguruan ibili da, eta Arabako Lautadan, berriz, 6-7 ºC inguruan, 1 ºC normala denaren gainetik lurralde osorako. Nahiz eta aldi hotz batzuk izan diren, bereziki urtarrilaren hasieran, artikoko airea sartu izanaren ondorioz, egoera epelak izan dira nagusi, batez ere otsailean, anomalia positiboak nabarmenagoak izan direnean, 2,4 ºC-rainokoak.

Negu honetan erregistratu den tenperaturarik baxuena urtarrilaren 6ko gauean erregistratu zen Iturrietan (-12,1 ºC), eta altuena San Prudentzion erregistratu zen (29,9 ºC) otsailaren 24tik 25era bitartean, isurialde kantauriarren hego-haizea nagusitu izanaren ondorioz.

MUTURREKO FENOMENOAK

Muturreko meteorologiari dagokionez, neguan egoera ugari izan dira. Zehazki, 7 alerta laranja eman dira haizeagatik haizeguneetan (1) eta olatuen altueragatik nabigaziorako (8); eta 121 abisu hori haizeagatik (21 haizeguneetan eta 10 haizeguneak ez diren lekuetan), prezipitazio iraunkorrengatik (6), elurragatik (14), izotzagatik (7) eta itsaso zakarragatik (30 olatuen altueragatik nabigaziorako, 27 kostaldeko inpaktuagatik eta 6 bustitze eta zipriztinengatik).

Haize-denboraleak eta itsasaldeko arriskua kostaldean izan dira gehien gertatu diren fenomenoak neguan zehar.