Getxoko Kirol Portuak kontrol eta mantentze-sistemak hobetuko ditu EKPren laguntza teknikoarekin

• Akordioak aukera emango du egungo prozesuak berrikusteko, hobekuntza posibleak detektatzeko eta jarraipen eta portuko instalazioetan kontrol tresna zehatzak aplikatzeko
• “Portuaren eguneroko kudeaketa hobetzen duten tresna zehatzekin aurrera pauso bat ematen dugu” azpimarratu du Amaia Barredo sailburuak

Gaur aurkeztu da Getxoko Kirol Portuaren Administrazio Kontseiluan Puerto Deportivo El Abra-Getxo sozietate publikoaren eta Eusko Jaurlaritzako Elikadura, Landa Garapena, Nekazaritza eta Arrantza Sailaren menpe dagoen Eus­kadiko Kirol Portuak (EKP) erakunde publikoaren arteko protokoloa, helburu nagusi batekin: Getxoko portu kirolaren kudeaketa integralean hobekuntzak sartzea.

Akordioak lehen fase batean egungo prozesuen diagnostiko tekniko bat egitea ahalbidetuko du, hobekuntza posibleak identifikatuz, hala nola azpiegituren mantentzean, instalazioen kudeaketan edo kontratazio-prozeduretan.

Azterketa horren ondoren, EKPk bere lan-ereduak eskainiko ditu mantentze prebentibo, zuzentzaile eta aurreikuslearen protokolo normalizatuak ezartzeko, baita instalazioen egoeraren kontrolerako, intzidientzien jarraipenerako eta ekintzen plangintzarako egiaztapen-zerrendak (checklistak) ere.

Kontratazioari dagokionez, laguntza teknikoa honako alderdiak hobetzera bideratuko da: beharrei definizioa ematea, espedienteen egitura eta kontratuen irizpide teknikoak, zerbitzuen exekuzioan eraginkortasuna, gardentasuna eta kontrola indartzeko helburuarekin.

Protokoloak jarraipen-periodiko sistema bat ere jasotzen du, bilera tekniko eta txostenen bidez, hobekuntzen ezarpena ebaluatzeko eta prozesuak etengabe egokitzeko.

“Akordio honek beste portu batzuetan funtzionatzen duten tresnak Getxon aplikatzeko aukera ematen du, hala nola mantentze-kontrol sistema edo kontratazio eredu eraginkorragoak” azpimarratu du Eusko Jaurlaritzako Elikadura, Landa Garapena, Nekazaritza eta Arrantza sailburua Amaia Barredok.

Era berean, Sailak Getxoko portuaren etorkizuna definitzeko prozesuan modu aktiboan parte hartuko du, Bilboko Portu Agintaritzak gidatutako Master Plan estrategikoaren bidez, portuaren kudeaketa eta kirol-nabigazioko ezagutza eta esperientzia eskainiz, Getxoko portua Europako Atlantikoaren arkuan erreferentziazko azpiegitura nautiko-kirolean bihurtzeko, birgaitzeko eta indartzeko helburuarekin.

Akordioak izaera teknikoa du eta ez du portuaren kudeaketan aldaketarik suposatuko; izan ere, kudeaketa Getxoko sozietate publikoaren eskumena izaten jarraituko du. Ez du gastu ekonomiko gehigarririk sortuko ezta entitateen artean pertsonalik sartuko.

“Gauzak nola egiten diren hobetzea da helburua, eta ez nork egiten duen aldatzea, Euskadiko kirol portuen sarean metatutako esperientzia baliatuz” gehitu du Amaia Barredok.

Protokoloa 2027ko abenduaren 31ra arte egongo da indarrean, eta bere garapena koordinatzeko eta ebaluatzeko jarraipen-batzorde bat sortuko da.