26_0235 Pertsona bat atxilotu dute Gasteizen pertsonen legez kanpoko trafikoagatik, A-1 autobidean furgoneta matxuratu ondoren

Ertzaintzak 29 urteko gizon bat atxilotu du gaur goizean Gasteizen, A-1 autobidetik furgonetan zeramatzan 8 pertsona legez kanpo trafikatzea egotzita. Ibilgailua matxuratu egin da eta errepideko bazterbidean geratu da.

Gaur goizaldean, 03:40an, Arabako Trafiko Unitateko patruila batek bi ibilgailu ikusi ditu geldirik A-1 autobideko bazterbidean, Gasteiz parean, 355. kilometroan, Burgoserako noranzkoan. Ibilgailuetako batek, auto bat, polizia-baliabidea ikustean, alde egin du.

Bigarren ibilgailua furgoneta bat zen, antza matxuratuta zegoena. Gidaria identifikatu zuten, eta barruan ez zegoen beste inor. Hala ere, ertzainek furgoneta kentzera joateko garabi bat eskatu dutenean, ilunpetan ikusi dute pertsona bat errepidetik kanpo ezkutatuta zegoela, eta laguntzera joan direnean, beste zazpi pertsona ezkututa aurkitu dituzte, jatorri asiarreko gizonezkoak guztiak, magrebtar jatorriko bat izan ezik.

Gasteizko ertzain-etxeko Herritarren Babeserako patruilak jarduketan hasi dira, eta pertsona guztiak ertzain-etxera eraman dituzte, behar bezala identifika ditzaten, bidaiari gehienek ez baitzuten dokumentaziorik. Polizia Nazionalaren Atzerritartasun Atalarekin ere kudeaketak egin dira.

Lehen ikerketen arabera, furgonetako bidaiariek diru kopuru bat ordaindu dute Frantziatik Espainiako hainbat lekutara joateko. Zenbait egiaztapen egin ondoren, ertzainek furgonetako gidaria atxilotu dute, jatorriz asiarra, pertsonen legez kanpoko trafikoaren ustezko delitu bat egotzita.

Ertzaintzak ikertzen jarraitzen du furgonetaren ondoan zegoen bigarren ibilgailua, gertakariekin zerikusia izan zezaketen beste pertsona batzuk zihoazena.