26_0328 Cuatro detenidos por detención ilegal y lesiones en Donostia / San Sebastián

Ertzainek lau gizon atxilotu dituzte Gipuzkoako hiriburuan legearen aurkako atxiloketa eta lesioak eragitea leporatuta, pertsona bat ibilgailu batean indarrez sartu, atxiki eta jotzeagatik. Biktimak, aurretik, patinete elektriko bat lapurtu zion atxilotuetako bati.

Atzo, asteartea, 21:00ak aldera, polizia agertzeko eskatu zuten Donostiako Altza auzoan, hainbat pertsona borrokan ari zirela eta horietako lauk gizon bat ibilgailu batean indarrez sartu zutela esanez.

Bertaratu zen patruila batek inguruan aurkitu zuen gizon batek agenteei esan zien jipoitu egin zutela, eta ibilgailu bat seinalatu zien, jipoitu zutenak barruan zeudela esanez. Agenteak gizonarekin hizketan ikustean, ibilgailua mugitzen hasi zen handik alde egiteko asmoz, baina patruila konturatu egin zen eta gelditzeko agindu zion.

Hasierako polizia-ikerketaren ondorioz jakin ahal izan zuten biktimak, antza denez, patinete bat lapurtu zuela ordu batzuk lehenago. Errepresalia moduan, ibilgailuaren jabeak eta beste hiru lagunek, pertsona hori aurkitu zutenean, jo egin zuten eta bortxaz auto batean sartu zuten. Bidean, inplikatuek eraso fisikoarekin jarraitu zuten eta, azkenean, biktima bide publikora bota zuten.

Horren aurrean, lau gizonak atxilotu zituzten legearen aurkako atxiloketagatik eta lesioak eragitegatik. Atxilotuak espainiar nazionalitateko 47 eta 41 urteko bi gizon, latinoamerikar jatorriko 37 urteko bat eta magrebtar jatorriko 27 urteko beste bat dira, eta lauak polizia-egoitzara eraman zituzten eta, zegozkion eginbideak amaitzean, epailearen eskuetan jarriko dituzte.

Biktima, asiar jatorrikoa eta 29 urtekoa, osasun-zentro batean artatu behar izan zuten.