26_0345 Donostian bi pertsona atxilotu dituzte eta hirugarren bat ikertu bankuko txartel bat lapurtu eta erosketak egiteko erabiltzeagatik

Ertzaintzak gizon bat eta emakume bat atxilotu ditu eta beste gizon bat ikertu du Gipuzkoako hiriburuan, zordunketa-txartel bat lapurtu eta bi mila euroko karguak egiteko erabiltzeagatik.

Zordunketa-txartela joan den astelehenean lapurtu zuten Donostian, nazionalitate espainiarra duen 71 urteko gizon baten etxean. Noizean behin bere etxean etxeko lanak egiten dituen emakume batek bankuko txartel bat lapurtu zion, eta, biktimaren telefono mugikorrera sartuta, bankuko aplikazioa desinstalatu zuen, egingo ziren karguen jakinarazpenik jaso ez zezan.  

Hurrengo egunean, ertzainek inguruko taberna batean aurkitu zuten ustezko lapurra, beste gizon susmagarri batekin batera, eta, prebentziozko miaketa egin zietenean, beren gauzen artean aurkitu zuten biktimaren izenean zegoen txartela, bai eta lurrindegiko produktu batzuk eta eskudirua ere.

Agenteek egiaztatu zuten identifikatutako bi pertsona horiek, hirugarren batekin batera, txartela erabili zutela Gipuzkoako hiriburuko lurrindegi batean eta estanko batean iruzurrezko erosketak egiteko, eta bi mila euroko karguak egin zituztela. Horrenbestez, biak atxilotu zituzten.  

Era berean, jakin zuten hirugarren pertsonak bi poltsa utzi zituela susmagarriak zeuden tabernan, eta poltsa horien barruan tabako-kartoiak eta estankoan erositako beste hainbat gauza zeuden, bai eta lapurtutako txartelarekin erositako lurrindegiko produktuak ere.

Atxilotutako 29 urteko emakume espainiarrari iruzur-delitua, ebasketa eta, biktimaren telefonoan haren baimenik gabe sartzeagatik, intimitatearen aurkako delitua leporatu dizkiote. Bere laguna, magrebtar jatorriko 35 urteko gizona, iruzur-delitu batengatik atxilotu dute. Biek polizia-aurrekariak dituzte, eta gaur goizean jarri dituzte epailearen eskuetan.

Gainera, ikertu gisa eginbideak ireki dizkiote hirugarren inplikatuari, espainiar nazionalitateko 27 urteko gizonari.