Ertzaintzako agenteek gizon bat atxilotu dute gaur goizaldean, Bilboko Indautxu auzoan oinezko bati indarkeria erabiliz erlojua lapurtzea leporatuta. Europa Leagueko partida dela-eta hedatutako prebentziozko dispositiboari esker, lapurreta egin eta handik laster aurkitu ahal izan dute susmagarria.
UEFA Europa Leagueko finala dela-eta Bilbon instalatutako segurtasun-kamerei begira zeuden agenteek ikusi dute pertsona bat beste baten atzetik korrika zihoala Indautxu auzoan.
Delitu-egintzaren bat izan zitekeela pentsatuta, hainbat patruila bertaratu dira eta biktimarekin harremanetan jarri dira. Gizonak salatu duenez, beste gizon batek lapurreta egin dio telefono-dei bat egiten ari zenean. Kolpatu ondoren, lurrera bota du eta jantzita zeraman gama altuko erlojua, 40.000 euro inguruko balioa duena, lapurtu dio.
Polizia-baliabideek ingurua miatu dute, eta zuhaixka batzuen atzean ezkutatuta aurkitu dute ustezko lapurra. Agenteek susmagarria identifikatu eta atxilotu dute, indarkeria erabiliz lapurreta egitea leporatuta; izan ere, zuhaixken artean aurkitu dute lapurtutako erlojua.
Atxilotua, 43 urtekoa, Ertzaintzaren egoitzara eraman dute dagozkion polizia-eginbideak irekitzeko. Horiek amaitu ondoren, agintari judizialaren eskuetan jarriko dute.