Joan den ostiralean Hondarribiko (Gipuzkoa) aparkaleku batean indarkeria erabiliz lapurreta egin zuen delitugile bat espetxeratzeko agindu du Irungo Guardiako Epaitegiak. Zerbitzutik kanpora zegoen ertzain batek lagundu zion biktimari delitugilea atxikitzen lankideak iritsi bitartean.
Gizona, 32 urtekoa, atxilotzea eta espetxeratzea eragin duten egitateak joan den ostiral gauean gertatu ziren Hondarribiko aparkaleku batean, biktimak bere ibilgailua aparkatuta zuen lekuan. Familiarekin batera ibilgailura iritsi zenean, bi gizon ikusi zituen barruan lapurretan. Kargu hartu eta indarka aritu ondoren, batek bihurkin batekin mehatxatu zuen, biktimaren objektu pertsonal batzuk hartuta ihes egiten saiatuz.
Ibilgailuaren jabearen oihuek oinezkoak ohartarazi zituzten, eta hainbat pertsonak, horien artean, zerbitzutik kanpora zegoen ertzain batek, lapurretako bat, zehazki biktimari objektu zorrotza erakutsi eta mehatxu egin zion gizona, harrapatzen lagundu zuten.
Handik laster, polizia-baliabideak ohartarazi ondoren, agenteak bertaratu ziren eta gizonaren kargu egin ziren, eta beldurra erabiliz lapurreta egiteagatik atxilotu zuten. Atxilotua, polizia-aurrekari ugari dituen 32 urteko gizona, Irungo Ertzain-etxera eraman zuten. Dagozkion eginbideak bete ondoren, agintari judizialaren eskuetan jarri zuten, eta deklaratu ostean, guardiako epaileak Gipuzkoako espetxean sartzeko agindu zuen.
Ertzaintzak ikertzen jarraitzen du indarkeria erabiliz egindako lapurretan parte hartu zuen bigarren pertsona atxilotu ahal izateko.